Banda­rískur frum­kvöðull fjár­festir í ís­lenskri tón­list

Það íslenska tónlistarfólk sem þegar hefur skrifað undir hjá fyrirtækinu eru jazz tvíeykið Silva & Steini, tónskáldið Magnús Jóhann og pönk bandið GRÓA. Haft er eftir Blum í tilkynningu að þó þetta tónlistarfólk sé ólíkt innbyrðis búi það allt yfir fágætum eiginleika sem hann kallar „hið íslenska Wabi-sabi“ en það er vísun í japanskt hugtak um að finna fegurðina í ófullkomleikanum.

Á vefsíðu útgáfufyrirtækisins útskýrir Blum hvers vegna hann ákvað að stofna FOUND. Hann segist hafa komið hingað til lands í mánuð til að hugleiða næstu skref sín. Á þessum tíma voru nokkrir mánuðir síðan hann seldi fyrirtækið DailyOM, sem hann stofnaði ásamt Madisyn Taylor árið 2004.

Þegar hingað til lands var komið ákvað Blum að gera sér ferð í plötubúðina Smekkleysu til að kynna sér sjálfstæðu tónlistarsenuna hér á landi. Eftir að hafa heillast af senunni, og þá sérstaklega hversu landamæralaus hún er, fór Blum að hugsa hvernig hann gæti kynnt fólk um allan heim fyrir þessari senu.

„Ég hafði ekki val um annað en að deila þessari mögnuðu tónlist með öllum heiminum. Þetta er tónlistarfólk sem dró mig inn og fyllti mig af orku,“ segir Blum.

Fljótlega eftir að hann kom aftur heim til sín í Kaliforníu-ríki í Bandaríkjunum ákvað hann að stofna útgáfufyrirtækið sem um ræðir. Blum segir að sér hafi fundist merkilegt hversu mikla sköpunargáfu hafi verið að finna hér á landi. 

„Það verður stundum til einskonar suðupottur af tónlist og listsköpun á ákveðnum tíma á ákveðnu svæði þar sem allt kraumar upp á yfirborðið og blandast saman. Til dæmis fann ég mjög sterkt fyrir því í Seattle á tíunda áratugnum en ég finn enn sterkar fyrir því á Íslandi núna,“ er haft eftir Blum í tilkynningunni.

Blum byrjaði sjálfur í tónlistarbransanum snemma á tíunda áratugi síðustu aldar. Þá gekk hann til liðs við hugbúnaðarfyrirtæki undir stjórn Paul Allen, meðstofnanda Microsoft, til að framleiða geisladisk fyrir tónlistarmanninn Peter Gabriel.

Eftir það stofnaði Blum eina af fyrstu tónlistarsíðum internetsins, iMusic, sem hann seldi svo til ARTISTdirect árið 1999. Hann gegndi stöðu framkvæmdastjóra rannsókna og þróunar í fimm ár hjá fyrirtækinu eftir það og hjálpaði til að mynda við að leggja grunninn að streymisþjónustu.

Að lokum ákvað Blum að hætta að vinna fyrir ARTISTdirect til að stofna DailyOM sem hann seldi svo árið 2021.