Nýr framkvæmdastjóri varúðareftirlits Seðlabankans

Þetta kemur fram í tilkynningu frá Seðlabankanum. Gísli hefur gegnt stöðu framkvæmdastjóra bankasviðs Seðlabanka Íslands frá því í september 2022 en hefur starfað sem settur framkvæmdastjóri varúðareftirlitsins síðan í janúar í kjölfar skipulagsbreytinga á fjármálaeftirlitssviðum bankans.

Í tilkynningu bankans kemur fram að Gísli hafi starfað í bankanum frá því í árslok 2020. Þá starfaði hann sem áhættustjóri bankans.

Þar áður var hann framkvæmdastjóri áhættustýringar Arion banka frá 2009 til 2020 og áður forstöðumaður í áhættustýringu Kaupþings banka frá 2006 til 2008.

Frá 1994 til 2006 var hann stjórnandi í hugbúnaðarþróun Mechanical Dynamics Inc í Bandaríkjunum. Gísli er með BS-gráðu í byggingarverkfræði frá Háskóla Íslands, MS-gráðu í hagnýtri aflfræði og doktorsgráðu í vélaverkfræði frá University of Michigan, auk þess að vera með próf í verðbréfaviðskiptum.