Kristín Soffía og Hlöð­ver Þór nýir leitarar

Þetta kemur fram í fréttatilkynningu. Kristín Soffía starfaði áður sem framkvæmdastjóri hjá Klak Innovit og hefur einnig verið borgarfulltrúi í Reykjavík. Hjá Klak hafi hún leitt endurmörkun félagsins og stofnað mentoraþjónustu Klak, þar sem reynslumiklir stjórnendur styðja við frumkvöðla. 

„Kristín situr í stjórn Orkusölunnar og hefur áður setið í stjórn Strætó, Þróunarfélags Grundartanga og Faxaflóahafna, þar sem hún var stjórnarformaður um árabil. Umhverfismál hafa skipað stóran sess hjá henni þar sem hún hefur séð hvernig visthæfing reksturs getur alið af sér ný tækifæri. Kristín ætlar sér að finna áhugavert fyrirtæki í framleiðslu og þjónustu sem hægt er að efla með hugmyndafræði hringrásarhagkerfisins,“ segir um Kristínu. 

Þá segir að Hlöðver Þór komi frá Kviku banka þar sem hann hafi síðast starfað sem forstöðumaður upplýsingatæknisviðs. 

„Þar byggði hann upp teymi sem kerfislega samþætti rekstur Kviku við Aur, Netgíró, TM og Lykil ásamt því að koma að uppbyggingu á innlánsreikningum Auðar. Hlöðver er reynslumikill stjórnandi og hefur tekið þátt í stofnun tveggja nýsköpunarfyrirtækja og unnið að vöruþróun þekktra lausna hérlendis. Hlöðver mun nú hefja leit að fyrirtæki þar sem reynsla hans og áhugi fer saman,“ segir í tilkynningunni.

Um Leitar Capital Partners segir að það leggi áherslu á að fjárfesta í ungu og öflugu fólki og aðstoða það við að finna fyrirtæki til að kaupa og reka. 

„Leitar gekk í fyrra frá 1,5 milljarða króna fjármögnun á fyrsta fjárfestingarsjóði félagsins sem einblínir á fjárfestingar í svokölluðum leitarsjóðum (e. search funds).

Leitarsjóðir eru stofnaðir utan um unga frumkvöðla, svokallaða leitara, sem Leitar fjármagnar til að finna fyrirtæki til að kaupa. Við kaupin tekur leitarinn við sem framkvæmdastjóri og stýrir fyrirtækinu í gegnum vöxt og umbreytingu þangað til fyrirtækið er selt aftur. Einnig fær leitarinn hlut í fyrirtækinu í upphafi sem getur stækkað í hlutfalli við ávöxtun fjárfesta.“