Lak leyniskjölunum til að ganga í augun á vinum sínum

Þetta kemur fram í frétt Washington Post sem hefur rætt við og fengið gögn og upplýsingar hjá mönnum sem voru í hópnum. Á þriðja tug ungra manna og táninga voru í hópnum, samkvæmt frétt Washington Post, og áttu þeir lítið sameiginlegt annað en að „elska byssur, hergögn og guð“ og stýrði maðurinn sem lak gögnunum spjallborðinu á Discord.

Spjallborðið kallaðist „Thug Shaker Central“ og þar kallaðist umræddur maður „OG“. Forsvarsmenn Discord segjast vinna með rannsakendum í Bandaríkjunum að því að bera kennsl á hann.

Vann á herstöð

Hin leynilegu gögn sem um ræðir eru myndir sem teknar voru af leynilegum skjölum sem voru meðal annars ætluð æðstu mönnum varnarmálaráðuneytis Bandaríkjanna og stjórnvalda. Þau snerust meðal annars um stríðið í Úkraínu og stöðu Úkraínumanna og Rússa, njósnir Bandaríkjamanna víða um heim, greiningar á stöðu heimsmála og ýmislegt annað.

Myndirnar voru teknar af skjölum sem höfðu verið prentuð út og virðast einhverrar myndanna hafa verið teknar heima hjá manninum sem kallaði sig OG.

Sjá einnig: Um­fangs­mikill gagna­leki veldur titringi í Was­hington

Samkvæmt upplýsingum Washington Post sagðist maðurinn sem kallaðist OG vinna á herstöð og verja nokkrum klukkustundum á dag á stað þar sem símar og önnur raftæki væru bönnuð, vegna þess að á staðnum var sýslað með leynileg gögn.

Í frétt Washington Post segir að OG hafi deilt myndbandi af sér með hópnum, þar sem hann sé vopnaður riffli. Á myndbandinu lætur hann frá sér rasísk ummæli, meðal annars um gyðinga, og skýtur svo á æfingarskotmark.

Rannsakendur Bellingcat höfðu áður rætt við einn af ungu mönnunum sem blaðamenn Washington Post ræddu við. Eftir að myndirnar voru birtar í Thug Shaker Central, fyrr á þessu ári, rötuðu þær á annað spjallborð á Discord tileinkað áhrifavaldi frá Filippseyjum og svo enn einu tileinkuðu hinum vinsæla leik Minecraft. Það var svo ekki fyrr en mánuði eftir það sem myndirnar rötuðu á almennari samfélagsmiðla og í fjölmiðla.

Deildu hundruðum mynda

Meðlimir hópsins kynntust fyrst í gegnum netið á öðru spjallborði Discord tileinkuðu bandarískum manni sem kallar sig Oxide og birtir byssumyndbönd á Youtube. OG bauð meðlimum þessa spjallborðs í Thug Shaker Central, þar sem þeir áttu að geta rætt sín á milli um tölvuleiki.

Í hópnum voru aðrir menn frá Bandaríkjunum, Austur-Evrópu og Suður-Ameríku, samkvæmt mönnunum sem ræddu við Washington Post.

Sjá einnig: Banda­ríkja­mönnum þótti Guter­res of viljugur til að draga taum Rússa

Undir lok síðasta árs skammaði OG aðra meðlimi hópsins fyrir að sína löngum færslum hans um stöðu heimsmála lítinn áhuga. Því ætlaði hann að hætta að birta þessar færslur vegna þess hve langan tíma það tæki hann að skrifa þær.

Þess í stað byrjaði hann að birta myndir af leynilegum skjölum sem hann hafði áður notað til að skrifa áðurnefndar færslur sínar. Þar sáu meðlimir spjallborðsins leynilegar gervihnattamyndir af eld- og stýriflaugaárásum Rússa í Úkraínu, kort af stöðu mála í Úkraínu og mögulegar flugleiðir langdrægra eldflauga frá Norður-Kóreu til Bandaríkjanna, svo eitthvað sé nefnt.

Sjá einnig: Búið að greina mögu­legar af­leiðingar and­láta Pútín og Selenskí

Myndirnar sýndu einnig að njósnastofnanir Bandaríkjanna höfðu ítarlegar upplýsingar um stöðu mála í rússneska hernum. Minnst eitt skjalið sem var myndað virðist hafa verið prentað úr Intellipedia, sem er forrit sem leyniþjónustur Bandaríkjanna nota til samvinnu milli stofnana.

OG byrjaði að deila þessum myndum með hópnum í lok síðasta árs og hélt hann því áfram næstu mánuði. Hann er talinn hafa deilt hundruð mynda af leynilegum skjölum með hópnum.

Sjá einnig: For­seti Egypta­lands hugðist sjá Rússum fyrir 40 þúsund eld­flaugum

Segja OG ekki uppljóstrara eða útsendara annars ríkis

Ungu mennirnir sem blaðamenn Washington Post ræddu við segja OG ekki vera útsendara Rússlands eða annars ríkis. Honum virðist þó hafa verið í nöp við bandarísk stjórnvöld og ræddi ítrekað um það að leyniþjónustur Bandaríkjanna og löggæsluembætti væru að berjast gegn íbúum Bandaríkjanna og að stjórnvöld landsins væru ill.

Til að mynda staðhæfði hann að yfirvöld hafi vitað af því fyrirfram að Payton S. Gendron hafi ætlað sér að skjóta svart fólk til bana í verslun í Buffalo í New York í fyrra. Ákveðið hafi verið að stöðva hann ekki svo öryggisstofnanir gætu beðið um aukið fjármagn.

Sjá einnig: Lífstíðarfangelsi yfir hvítum þjóðernissinna vegna fjöldamorðsins í Buffalo

Annar ungu mannanna sem ræddi við Washington Post segir OG ekki vera einhverskonar uppljóstrara. Hann hafi viljað stæra sig af aðgangi sínum að leynilegum gögnum og að myndirnar hefðu ekki átt að rata út fyrir þeirra litla hóp.

Báðir mennirnir segja OG ekki hafa gert neitt rangt, en kenna þess í stað þeim sem dreifði myndunum fyrst um að hafa eyðilagt hið litla samfélag þeirra.

Njósnarar sagðir herja á leikjaspilara

Sérfræðingar segja í samtali við Washington Post að þúsundir ungra starfsmanna hersins eða yfirvalda hafa getað haft aðgang að umræddum gögnum. Þá hafa rannsakendur lengi haft áhyggjur af því að forrit eins og Discord og aðrir kimar internetsins þar sem leikjaspilarar komi saman geti verið notaðir til njósna.

Rússneskir njósnarar séu til að mynda grunaðir um að hafa reynt að vingast við leikjaspilara sem þeir töldu hafa unnið fyrir bandarískar leyniþjónustur og reynt að fá þá til að deila leynilegum upplýsingum. Ekki er vitað til þess að það hafi virkað en hafi erlendur njósnari orðið sér út um aðgang að Thug Shaker Central hafi þeir getað skoðað myndirnar að vild.