Bentu hvor á annan í máli sem endaði með sjö hundruð milljóna sekt

Dómur í málinu féll í gær en Þorkell var í desember 2021 ákærður fyrir að meiri háttar brot gegn skattalögum og bókhaldslögum í rekstri Smíðalands ehf og starfsmannaleigunnar 2findjob ehf upp á samtals tæplega 260 milljónir króna.

Þorkell hefur áður komist í kast við lögin í tengslum við rekstur 2findjob.

Var hann sakfelldur fyrir hættubrot við rekstur starfsmannaleigunnar 2findjob ehf., sem áður var minnst á, með því að hafa látið starfsmenn búa í vistarverum við Smiðshöfða sem lýst var sem hættulegum „svefnskápum“. Hlaut hann fimm mánaða skilorðsbundinn dóm fyrir brotin.

Fjallað var um Þorkel og starfsmannaleiguna 2findjob í fréttum Stöðvar 2 árið 2021.

Fyrir dómi í tengslum við skattalagabrot Smíðalands virðist einkum hafa verið tekist á um hvor bæri ábyrgð á brotunum, Þorkell eða starfsmaður hans. Umræddur starfsmaður var á síðasta ári sakfelldur fyrir að hafa skilað röngum skattframtölum og ekki talið fram tekjur frá einkahlutafélaginu Smíðalandi á þriggja ára tímabili. Fram kemur í dómi héraðsdóms að þeim dómi hafi verið áfrýjað til Landsréttar.

Sagðist ekkert vit hafa á bókhaldi

Þorkell bar vitni fyrir dómi og sagðist ekkert hafa vit á bókhaldi. Hann hafi í raun hvergi komið nærri bókhaldi félagsins, Það hafi allt verið í höndum umrædds starfsmanns sem starfað hafi hjá Smíðalandi frá stofnun félagsins og þangað til reksturinn var kominnn í öngstræti.

Umræddur starfsmaður hafi tekið allar ákvarðanir um fjármál félagsins og stýrt því hverjum ætti að greiða og hvað.

Starfsmaðurinn hafði aðra sögu að segja. Að sögn hans hafði Þorkell stýrt daglegum rekstri félagsins og fjármálastjórn þess frá A-Ö. Starf hans hafi eingöngu verið verkefnastjórn og að gefa út reikninga, án þess að hafa aðgang að reikningum félagsins.

Í dómi héraðsdóms kemur fram að á einum tímapunkti hafi annar starfsmaður verið ráðinn inn sem verktaki til að koma böndum á fjárhag félagsins. Bar hún vitni um að hún hafi aðeins starfað í um einn mánuð og gengið út þegar „„allt var að fara til fjandans“, bókhaldið ekki í lögmæltu ástandi og ekkert hægt að gera við því eftir á,“ eins og það er orðað í dómi héraðsdóms.

Óáreiðanlegur framburður bókarans

Bar hún vitni um að umræddur starfsmaður hafi starfað sem bókari og meðal annars séð um launagreiðslur. Til þess hafi hann tekið út háar fjárhæðir úr banka, meðal annars í eitt skipti um tíu milljónir króna sem hann sneri aftur með á skrifstofuna í bréfpoka. Umræddur starfsmaður sagðist reyndar ekki kannast við þessa lýsingu fyrir dómi. Að hennar sögn sáu Þorkell og hinn starfsmaðurinn um skattskil félagsins, en engu hafi verið skilað inn.

Í niðurstöðu héraðsdóms segir að framburður starfsmannsins sem ýmist var kallaður fjármálastjóri, bókari eða verkefnastjóri, sé svo óáreiðanlegur að ekki hafi verið hægt að byggja á honum í málinu.

Í niðurstöðu hérðaðsdóms var litið til þess að Þorkell hafi verið skráður í stjórn og sem framkvæmdastjóri. Meira þyrfti að koma til en framburður hans um að hinn starfsmaðurinn bæri ábyrgð á málinu. Ekki væri hægt að líta framhjá skyldum Þorkels sem framkvæmdastjóra og stjórnarmanns.

Við ákvörðun var litið til þess að Þorkell hafi á engum tímapunkti neitað sök í málinu. Þá hafi hann gert upp við ríkissjóð alls 31 milljón króna virðisaukaskattskuld. Þó væri ekki hægt að horfa framhjá því að brotin væru stórfelld.

Er honum gert að greiða alls 713 milljónir króna í sekt fyrir brotin, auk tveggja ára skilorðsbundins fangelsis sem falli niður eftir þrjú ár haldi hann skilorði. Þá þarf Þorkell að sæta 360 daga fangelsi greiði hann ekki umrædda sekt innan árs.