Búa sig undir ákæru á hendur Trump

Borgaryfirvöld í New York eru sögð undirbúa sig fyrir mögulega handtöku Trumps og möguleg mótmæli vegna þeirra. Það er þó alveg óljóst hvort Trump verði ákærður í dag eða hvort hann verði ákærður yfir höfuð.

Stuðningsmenn forsetans fyrrverandi komu saman í New York í gær til að mótmæla mögulegri handtöku Trumps. Mótmælin voru þó frekar fámenn, að fréttamönnum,  ljósmyndurum og myndatökumönnum undanskildum.

Trump sagði frá því á laugardaginn að hann ætti von á því að verða handtekinn í dag, þriðjudag. Í færslum á Truth Social, hans eigin samfélagsmiðli, vísaði Trump í „ólöglega leka“ en að öðru leyti sagði hann ekki hvers vegna hann ætti von á handtöku í dag.

Sjá einnig: Trump segir að hann verði handtekinn

Alvin Bragg, umdæmissaksóknari í Manhattan, hefur undanfarið rannsakað 130 þúsund dala greiðslu Michaels Cohens, þáverandi einkalögmanns Trumps, til Stephanie Clifford, fyrrverandi klámleikkonu sem gengur einnig undir nafninu Storym Daniels, skömmu fyrir forsetakosningarnar 2016.

Greiðslan var fyrir þögn hennar en Clifford hefur haldið því fram að hún hafi sængað hjá Trump skömmu eftir að Melania Trump eignaðist Barron Trump árið 2006.

Bragg er að kanna hvort lög varðandi kosningar í Bandaríkjunum hafi verið brotnar en Cohen greiddi Clifford úr eigin vasa og Trump greiddi Cohen. Rannsóknin hefur meðal annars snúist um það hvort greiðsluna megi skilgreina sem framlög til framboðs Trump og fer það langt yfir hámarkið sem einstaklingar mega gefa til framboðs stjórnmálamanns, sem er 2.700 dalir.

Fjölmiðlar vestanhafs hafa sagt að rannsókn ákærudómstólsins sé langt á veg komin.

Bragg hefur myndað ákærudómstól með málið til rannsóknar um nokkuð skeið og hefur það verið skoðað af ákærudómstól.

Ákærudómstóll er fyrirbæri vestanhafs (e. Grand jury) þar sem kviðdómendur eru fengnir til að fara yfir vitnisburð og gögn í ákveðnum málum og kanna hvort þeim þyki tilefni til að leggja fram ákærur vegna meintra brota. Dómstóllinn hefur verið að skoða hvort Trump hafi brotið kosningalög með greiðslu til fyrrverandi klámleikkonunnar Stephanie Clifford (Stormy Daniels).

Gæti reynst erfitt að sakfella Trump

Til að sakfella Trump þyrfti Bragg að sýna fram á að Trump hafi endurgreitt Cohen og að hann hafi falsað gögn til að fela brot á lögum um kosningar, samkvæmt frétt New York Times.

Tekið er fram í frétt NYT að málið sé ekki einfalt og að bæði yfirkjörstjórn og alríkissaksóknarar hafi rannsakað málið og ákveðið ákæra ekki.

Trump hefur neitað því að hafa sængað hjá Clifford og segist ekkert hafa gert af sér. Í fyrstu sagðist hann ekkert vita um greiðsluna til hennar en síðar meir leit upptaka dagsins ljós þar sem heyra mátti hann og Cohen tala um greiðsluna.

Trump stendur einnig frammi fyrir mögulegri ákæru í Georgíu og þá vegna tilrauna hans til að snúa niðurstöðum forsetakosninganna 2020.

Þar hefur ákærudómstóll verið að skoða hvort Trump og bandamenn hans hafi brotið lög með því að þrýsta á embættismenn í Georgíu og reyna að fá úrslitum kosninganna hnekkt. Fregnir hafa borist af því að meðlimir ákærudómstólsins lögðu til að ákærur yrðu gefnar út. Ekki er vitað hverjir yrðu ákærðir samkævmt þeim tillögum en ákvörðunin um ákærur er á höndum Fani T. Willis, héraðssaksóknara í Fultonsýslu.

Verja Trump enn eina ferðina

Repúblikanar hafa margir brugðist reiðir við fregnum af mögulegri ákæru í New York. Aðrir hafa séð tækifæri til að reyna að slíta Repúblikanaflokkinn frá Trump. Slík tækifæri hafa verið fjölmörg í gegnum árin og hafa nokkrir reynt, án árangurs.

Tangarhald Trumps á flokknum virtist lausast eftir árásina á þinghúsið þann 6. janúar 2021. Kevin McCarthy, núverandi forseti Fulltrúadeildar Bandaríkjaþings og aðrir bandamennhans á þingi komu Trump þó til bjargar.

Það var eftir að McCarthy sagði Trump bera ábyrgð á árásinni og spurði aðra þingmenn hvort hann ætti kalla eftir afsögn Trumps. Við það mun Trump hafa kallað McCarthy „ræfil“ (e. pussy).

Skömmu síðar var McCarthy þó farinn til Flórída þar sem hann leitaði á náðir forsetans fyrrverandi.

Sjá einnig: Repúblikanar leita á náðir Trumps

Eins og greint er frá í frétt AP fréttaveitunnar hafa Repúblikanar alltaf fylgt liði bakvið Trump, aftur og aftur. Skoðanakannanir benda til þess að hann sé líklegastur til að hljóta tilnefningu Repúblikanaflokksins en Ron DeSantis, ríkisstjóri Flórída, á enn eftir að lýsa því formlega yfir að hann sækist eftir tilnefningunni.

Aðrir líklegir frambjóðendur eins og Mike Pence, Chris Christie og Chris Sununu hafa allir sagt eða gefið til kynna að verið sé að koma óheiðarlega fram við Trump. Repúblikanar hafa verið gjarnir á að gagnrýna Bragg fyrir að rannsaka Trump en ekki það sem þeir kalla „alvarlegri glæpi“ og þá hafa þeir einnig reynt að bendla Bragg við George Soros, auðjöfur og góðgerðarmaður frá Ungverjalandi sem er vinnsælt skotmark samsæringa og íhaldsmanna.

Ron DeSantis sló á svipaða strengi í gær en skaut samhliða á Trump og sagðist ekki alveg átta sig á því hvað fælist í því að borga klámstjörnu fyrir að þaga um framhjáhald.

Fáir hafa þó staðið þéttar við bakið á Trump í þessu máli en McCarthy.

Hann og aðrir í fulltrúadeildinni tala gjarnan um pólitískar ofsóknir og hafa heitið því að stofna þingnefnd til að rannsaka Bragg. Repúblikanar sendu honum bréf í gær þar sem þeir kröfðust allra gagna og skjala sem sneru að „fordæmalausri valdmisbeitingu valds saksóknara“, eins og þeir kölluðu mögulega ákæru gegn Trump.

McCarthy hefur þó sagt að hann vilji ekki að fólk mótmæli, verði Trump ákærður.