Hefja við­ræður um kaup Festi á Lyfju fyrir um 7,8 milljarða króna

Þetta kemur fram í tilkynningu Festi til kauphallar vegna samkomulagsins. Þar segir að Festi sérhæfi sig í rekstri smásölufyrirtækja og reki meðal annars Krónuna, N1 og Elko ásamt því að eiga og reka alls 87 fasteignir samtals um 95.000 fermetra að stærð, víðs vegar um landið. Einnig reki félagið tvö vöruhús undir nafni Bakkans vöruhótels sem sérhæfi sig í vöruhúsaþjónustu og dreifingu. Heildarvelta Festi hafi 131 milljarður króna árið 2022.

Þá segir að félögin tvö muni í framhaldi af undirrituninni hefja samningaviðræður um kaupin með það að markmiði að komast að samkomulagi um efni endanlegs kaupsamnings. Samningaviðræðurnar byggi á forsendum og skilmálum samkomulagsins sem undirritað var í dag, að teknu tillits til niðurstaðna áreiðanleikakönnunar kaupanda.

Lyfja metin á 7,8 milljarða króna

Samkomulagið felur í sér að heildarvirði Lyfju sé 7,8 milljarðar króna en endanlegt kaupverð hlutafjár mun ráðast af skuldastöðu félags við afhendingu ásamt gengi hlutabréfa í Festi á þeim tíma.

Samkvæmt tilkynningu segir að áætlanir Lyfju geri ráð fyrir að hagnaður fyrir afskriftir, fjármagnsliði og skatta (EBITDA), án IFRS16 áhrifa nemi 1.044 milljónum króna. Í samkomulaginu sé gert ráð fyrir að greiða kaupverðið með afhendingu 10 milljónum hluta í Festi eða 1,8 milljarða miðað við dagslokagengi Festi í Kauphöll og sex milljarða króna með handbæru fé.

Þá segir að kaupin séu meðal annars háð skilyrðum um að samkomulag náist um endanlegan kaupsamning, framkvæmd áreiðanleikakönnunar, fjármögnun viðskiptanna, að hluthafafundur kaupanda samþykki ráðstöfun hlutafjár vegna viðskiptanna og samþykki Samkeppniseftirlitsins.

Kom af krafti inn úr fæðingarorlofi

Í fréttatilkynningu segir að Ásta S. Fjeldsted, forstjóri Festi, hafi mætt formlega aftur til leiks í dag eftir fæðingarorlof. Hennar fyrsta verk var því að undirrita samkomulag um kaup á stærstu apótekskeðju landsins.

„Kaupin eru hluti af framtíðarsýn Festi um að bjóða upp á breitt vöruúrval nauðsynjavara á hagkvæmu verði um allt land. Með sölu lyfja og lækningavara getum við betur þjónað viðskiptavinum okkar ásamt því að taka þátt í að stuðla að bættri lýðheilsu í landinu. Lyfja er traust fyrirtæki sem hefur lagt ríka áherslu á fræðslu og fyrirbyggjandi heilsuvernd. Þessi áhersla kallast á við framtíðarsýn félaga innan Festi. Með rótgrónu og sterku vörumerki Lyfju og því reynslumikla fagfólki sem þar starfar verður hægt að byggja enn eina sterka stoð innan samstæðu Festi,“ er haft eftir henni í tilkynningu.

Keypti Lyfju af Lindarhvoli fyrir fimm árum

Eigandi Lyfju, SID ehf., er að mestu í eigu framtakssjóðsins SÍA III, sem er í rekstri sjóðastýringarfyrirtækisins Stefnis. Aðrir eigendur eru félög í eigu fjárfestanna Inga Guðjónssonar og Daníels Helgasonar.

Félagið keypti Lyfju af Lindarhvoli, umsýslufélagi sem var falið að halda utan um stöðugleikaeignir íslenska ríkisins eftir efnahagshrunið árið 2008. Kaupverðið var um 4,2 milljarðar króna og því hafa eigendur ávaxtað pund sitt vel á fimm árum, ef af 7,8 milljarða kaupverðinu verður.

Athygli vakti á sínum tíma að tilboð SID ehf. í Lyfju var ekki það hæsta sem barst. Árið 2017 hafði Samkeppniseftirlitið ógilt kaup Haga á Lyfju en smásölurisinn hafði samþykkt að greiða 6,7 milljarða króna fyrir apótekskeðjuna.