Grunuð um fjöldann allan af líkams­á­rásum, þjófnaði og rán

Úrskurður Landsréttar féll í gær en þar segir að alls séu 25 mál konunnar til rannsóknar hjá lögreglu og ákæruvaldi. 

„Sakarefni málanna eru ítrekaðir þjófnaðir, líkamsárásir, nytjastuldur og skjalafals, gripdeild, eignaspjöll, fjársvik, rán, frelsissvipting, fíkniefnalagabrot og ítrekuð umferðarlagabrot,“ segir í úrskurðinum. Eru 14 mál til rannsóknar hjá lögreglustjóranum á Norðurlandi eystra, níu mál hjá lögreglustjóranum á höfuðborgarsvæðinu og tvö mál hjá lögreglustjóranum á Vesturlandi. 

Samkvæmt sakavottorði nær sakaferill hennar aftur til ársins 2012 en hún hefur sex sinnum hlotið refsidóm fyrir svipuð brot. Var fallist á mat lögreglustjóra að hún væri líkleg til að halda brotum áfram á meðan rannsókn er ólokið.

Í úrskurði Héraðsdóms Norðurlands eystra er brotum konunnar lýst nánar. Þar kemur meðal annars fram að konan hafi ráðist á sambýlismann sinn með hníf og að hann hafi verið blóðugur á enni og undir hægra auga eftir atlöguna. 

Þá hafi hún brotist inn í hús í ágúst á síðast ári og neytt brotaþola til að taka út peninga af debetkorti. 

Auk þess er hún grunuð um að hafa í fjölmörg skipti stolið bifreið, í eitt skipti farið upp í bifreiðina þegar eigandi hafi verið var að setja vörur í bifreiðina.  

Enn fremur er hún grunuð um fjölmörg þjófnaðarbrot, gripdeild og skjalafals. 

Úrskurður Landsréttar.