„Það liggur alveg fyrir að við þurfum sterkara kerfi“

Mennta- og barnamálaráðuneytið stendur í dag fyrir þjóðfundi um framtíð skólaþjónustu en um er að ræða lið í samráðsferli sem hefur staðið yfir í nokkurn tíma og undirbúning fyrir ný lög í málaflokknum.

Niðurstöður samráðsferlisins voru meðal þess sem kynntar voru í dag en Sigrún Daníelsdóttir, verkefnastjóri hjá mennta- og barnamálaráðuneytinu, segir að rætt hafi verið við mörg hundruð manns á samráðsfundum og í skólaheimsóknum um þeirra upplifun af stuðningsþjónustu í skólum og væntingar til nýrra laga. Mikill samhljómur hafi verið milli ólíkra hópa hagsmunaaðila og heldur vinnan áfram í dag.

„Við viljum heyra hugmyndir fólks um skipulag þjónustunnar, viðfangsefni hennar og hvar eigi að draga mörkin, til dæmis á milli skólaþjónustu, heilbrigðisþjónustu, félagsþjónustu og annarra kerfa. Það verða teknar fyrir tólf svona lykilspurningar eftir hádegið þar sem við vonumst til þess að fá skemmtilegar og gagnlegar hugmyndir að lausnum,“ segir Sigrún.

Fjöldi skóla og barna fái ekki þá þjónustu sem þau þurfi

Töluvert af úrlausnarefnum standi eftir hvað varðar kerfið í heild samhliða þróun samfélagsins og aukins fjölbreytileika. Mæta þurfi fjölbreyttum áskorunum í skólakerfinu.

„Það liggur alveg fyrir að við þurfum sterkara kerfi til þess að halda utan um þarfir skólasamfélagsins og þær áskoranir sem þar eru. Það vantar líka miðlægan aðila sem að getur stigið inn í mál þar sem það eru kannski ekki til lausnir innan skólans eða jafnvel innan bæjarfélagsins,“ segir Sigrún en slíkur miðlægur aðili hefur ekki verið til staðar fram að þessu.

Ráðherra hefur lagt fram frumvarp til laga um nýja miðlæga þjónustustofnun og er frumvarpið komið í Samráðsgátt. Stofnuninni er ætlað að fara með þjónustu, ráðgjöf og stuðning við skólastarf og skólaþjónustu en með frumvarpinu er lagt til að menntamálastofnun verði lögð niður og verkefni þeirra að hluta flutt yfir til nýrrar stofnunar.

Um verður að ræða faglega þekkingarmiðstöð á landsvísu sem styður meðal annars við innleiðingu farsældarþjónustu í skólum. Að sögn Sigrúnar mun slík stofnun gegna mikilvægu hlutverki hvað varðar heildarsýnina.

„Staðan er þannig í dag að fjöldi sveitarfélaga eða fjöldi skóla er í raun ekki að fá þjónustu sem þau þurfa til að geta sinnt gæðamenntun, fjöldi barna er ekki að fá þá þjónustu sem þau þurfa til þess að geta dafnað í námi. Það er þetta sem við þurfum að finna leiðir til þess að brúa á öllu landinu, þvert á öll skólastig,“ segir Sigrún.

Skipuleggja þurfi þjónustuna vel og ljóst að ákveðnir þættir muni taka nokkurn tíma, svo sem þrepaskiptur stuðningur í skólum og styrking innviða. Hugsað er í lausnum í framhaldinu.

„Það er verið að vinna þetta á tvenns konar vettvangi, annars vegar í mjög miklu langtímaplani en svo er líka verið að teikna upp úrræði sem að getur vonandi litið dagsins ljós mjög fljótlega,“ segir Sigrún.