Ein­stakt á Ís­landi og jafn­vel í heiminum

Ísak sagði að liðsheildin hafi verið lykillinn að sigrinum. „Ef við horfum á stigatöfluna þá er einn maður með 20 stig, aðrir minna. Níu leikmenn með fimm stig eða meira og einn af þeim spilaði bara í fyrsta leikhluta. Þetta var geggjaður liðssigur og menn sýndu breiddina sem liðið hefur.“

„Það er ógeðslega gaman að fá framlag frá öllum sem komu inná, það sýnir styrk liðsins í þessari brekku sem við vorum í og erum byrjaðir að klífa upp núna.“

Skömmu fyrir viðtalið varð ljóst að Höttur vann KR. Liðin þrjú eru öll í fallbaráttu. Skiptir það einhverju máli? 

„Við þurfum að vinna fullt af leikjum til að halda okkur í deildinni. Það er svo mikið eftir af þessu móti að við ætlum ekki að útiloka úrslitakeppni. Núna förum við bara í þetta með smá „fokk-it“ hugarfari og ætlum að vinna hvern einasta leik.“

Ísak grínaðist með að breytingin á ÍR-liðinu fælist í því að ÍR goðsögnin Sveinbjörn Claessen væri mættur á bekkinn með þjálfunum. 

„Hann kom á bekkinn og það kemur ferskur blær með honum. Það vita allir hvað hann stendur fyrir.“

„Það keyptu sig líka allir inn í hvað planið var og aldrei datt mórallinn í eitthvað þrot. Það segir mikið um gæjana í þessu liði.“

Ísak var beðinn um að meta stöðuna eins og hún er akkúrat núna. 

„Það er annað sem hefur breyst. Ég er hættur að kíkja á stöðutöfluna. Ég veit varla hvað liðin eru með mörg stig. Við ætlum að vinna eins marga leiki og við getum og sjá hvað það skilar okkur.“

Stuðningsveit ÍR-inga, Ghetto Hooligans, studdi sína menn frábærlega í kvöld, vel mætt og mikill hávaði í þeim. Hvernig er að spila á útivelli en samt í rauninni á heimavelli með þennan stuðning?

„Það er bara geggjað. Ég verð að taka hatt minn ofan fyrir þeim. Þetta er alveg einstakt held ég á Íslandi og þess vegna í heiminum. Við fengum frábæran stuðning á móti Grindavík á heimavelli í síðasta leik. Við vinnum hann, vorum búnir að tapa sex eða sjö leikjum á undan því, mætum svo hérna þar sem mesta stemningslið deildarinnar er að spila. Mínir menn eiga þessa stúku og það er bara ógeðslega gaman,“ sagði Ísak.

Í viðtalinu var hann einnig spurður út í vítanýtingu Taylor Jones sem setti niður þrjú af fjórum vítaskotum sínum. Ísak segir að hann búist ekki við öðrum hauskúpuleik af vítalínunni aftur eins og gegn Grindavík þar sem ekkert gekk.

Ísak var þá ánægður með Hákon Örn Hjálmarsson sem endaði stigahæstur í kvöld hjá gestunum með tuttugu stig. Hákon byrjaði á bekknum. Ísak segist heppinn að vera með þrjá frábæra bakverði, allir vilji byrja og enda leikina en á meðan sigrarnir koma þá hljóti allir að vera sáttir.

Loks var hann spurður út í Luciano Massarelli sem meiddist snemma í leiknum og segir Ísak að sinn maður fari í myndatöku á morgun.