Tvíhöfði snýr aftur í hlaðvarpi

Líklega þarf ekki að kynna tvíeykið sérstaklega fyrir þjóðinni nema þá kannski yngstu kynslóðinni. Jón og Sigurjón slógu í gegn á X-inu 977 árið 1994 og líklega voru fáir sem kepptu við þá félaga í vinsældum í útvarpi á þeim tíma.

Félagarnir gáfu út geisladiska með grínsketsum þar sem goðsagnir á borð við Adrian Nigelsson og Suðu-Sigfús komu við sögu. Þá er mörgum í fersku minni útvarpslýsing þeirra á úrslitaleik heimsmeistaramótsins í knattspyrnu í Frakklandi 1998 en þeir félagar hafa lítinn áhuga á íþróttum.

Spjallað var við þá Jón og Sigurjón í Íslandi í dag árið 2011. Þar ræddu þeir Tvíhöfða, Fóstbræður og margt fleira.

Fram kemur í tilkynningu frá Tal að nýjustu tveir þættirnir séu væntanlegir 15. febrúar og aðgengilegir á vefsíðu Tals.

Von er á nýjum þætti í hverri viku auk eldra efnis úr smiðju þeirra félaga. Þar má nú þegar finna þætti frá 1997 og 1999 ásamt upptöku frá Húrrakvöldi Tvíhöfða þann 22. október í fyrra.

„Það var okkur mikið gleðiefni að kynnast TAL og vera boðið að vera hluti af því mengi öllu og geta þar byggt upp okkar eigin Tvíhöfðaheim. Við sáum okkur ekki fært að halda Tvíhöfða úti með þeim hætti sem verið hefur og ekki heldur fært að sjá um tæknilegar útfærslur á eigin þáttagerð. Okkur finnst þetta mjög spennandi tímar og hlökkum til samstarfsins. Við erum báðir orðnir frekar eirðarlausir að komast í það að blaðra frá okkur allt vit. Við hlökkum auðvitað báðir mikið til að fá að dvelja í því nærandi hugarástandi sem Tvíhöfði er fyrir okkur. Við erum ákaflega stoltir að geta fært hlustendum okkar spriklandi nýjan og ferskan Tvíhöfða,“ segja þeir félagar Jón og Sigurjón í tilkynningu.

Tal.is er hluti af fjölmiðlum Sýnar og stefnir á að verða heimili íslenskra hlaðvarpa. Hlaðvarpsheimur Tals var settur af stað fyrir tveimur árum og hefur vaxið jafnt og þétt síðan. Tal vill styðja við íslenska framleiðslu á hlaðvarpi og leggja til þekkingu og tæknilega aðstoð við stjórnendur hlaðvarpa.

Fjölmörg hlaðvörp eru í boði á Tal.is og meðal þeirra eru Blökastið, Eftirmál og Þungavigtin.

„Þetta eru frábærar fréttir! Tal er í miklum vexti og við ætlum að kynna mörg ný verkefni á næstu misserum. Það er svo gaman þegar skapandi einstaklingar sjá hvað við erum að gera og langar að vinna með okkur. Ég hef lengi verið aðdáandi strákanna og hélt að Tvíhöfði heyrði sögunni til þegar þeir tilkynntu í apríl að þeir væru hættir, sem gerir þetta ennþá skemmtilegra. Það er margt spennandi í kortunum hjá Tvíhöfða, nýtt og gamalt efni auk skemmtilegra viðburða og uppákoma. Þetta er algjör draumur fyrir alvöru aðdáendur Tvíhöfða. Eins og einhverjir myndu segja, Tvíhöfði er sómi Íslands, sverð þess og skjöldur,“ segir Auðun Bragi Kjartansson, forstöðumaður Tals, í tilkynningu.

Hann bætir við að allir sem gerist áskrifendur að Tvíhöfða fyrir 15. febrúar fái þrjátíu daga áskrift að streymisveitunni Stöð 2+.