Þrjú sveitar­fé­lög hafna boði N4 um sam­starf við frétta­flutning

Í athyglisverðu bréfi sem María Björk ritar sveitarstjórnum og sendi sveitarfélögum á Norðurlandi eystra í byrjun síðasta mánaðar, þakkar hún þeim framlag þeirra til „fjölmiðlunar af svæðinu“ sem nemur samkvæmt bókahaldi N4 tæpum 4,6 milljónum króna. Þegar sé búið að taka upp allt efni og byrjað að sýna í þættinum „Að norðan það sem um var samið“.

Ef N4 loki sé ekkert nema eitt og eitt innslag í Landanum

María Björk segir N4 standa frammi fyrir „stórum sem snýr að fjölmiðlun frá landsbyggðunum en síðustu ár hefur N4 framleitt og sýnt 350-400 þætti á ári, sem er sú krafa sem gerð er til að geta fallið undir forsendur fjölmiðlastyrksins.“

Hún segir áhorfið á N4 gott en ekki fari saman aukið áhorf og tekjur. Auglýsingatekjur fari minnkandi og fimmtíu prósent þeirra fari í erlendar veitur. Þá segir hún að erfiðleikar í rekstri nokkurra sveitarfélaga bitni á þáttagerð frá þeim svæðum og minnkandi tekjur af kostunum á þáttum sem geri einnig að verkum að útlitið sé mjög dökkt yfir rekstri N4 á næsta ári.

Erindi Maríu Bjarkar til sveitarstjórnanna er dagsett 9. desember, sem er viku eftir að hún skrifaði bréf til fjárlaganefndar sem leiddi til þess að Bjarkey Olsen og meirihluti fjárlaganefndar ákvað að eyrnamerkja N4 hundrað milljónir króna. Nefndin var svo gerð afturreka með þá fyrirætlan sína og fer sú upphæð í sameiginlegan pott sem notaður hefur verið til að styrkja fjölmiðla á markaði. Meðal þess sem vakti athygli í því máli var sú staðreynd að mágur Maríu Bjarkar, Stefán Vagn Stefánsson Framsóknarflokki, á sæti í meirihluta fjárlaganefndar sem samþykkti styrkveitinguna.

„Tillaga Fjárlaganefndar að setja upp sjóð til að efla sjónvarpsþáttagerð af landsbyggðunum er þó ljósið í myrkinu. Útfærslan er eftir og hvort N4 fær eitthvað, allt eða ekkert á eftir að koma í ljós,“ segir María Björk.

Hún í beinu framhaldi eftir standi að kanna áhuga sveitarfélaga á Norðurlandi eystra „til þess að leggja sín lóð á vogarskálarnar um að leggja ekki árar í bát, heldur sækja fast fram í að efla þáttagerð, umfjöllun og fréttir af svæðinu. Það er ljóst að ef N4 þarf að loka verður stutt í að landsbyggðirnar þurfi að reiða sig alfarið á fjársvelta staðarmiðla og sífellt minni umfjallanir nema beinharðar fréttir frá RÚV, og eitt og eitt innslag í Landann.“

Sveitarfélögin hafna samstarfi að svo stöddu

María Björk segir aðra miðla ekki hafa nokkrar „skyldur við landsbyggðirnar“.

Þá býður framkvæmdastjórinn sveitarfélögunum, saman eða hvert í sínu lagi, að koma til viðræðna um að stórefla fjölmiðlun frá svæðinu. Til dæmis „með því að gera það að áhersluverkefni næstu 3ja ára.“

Byggðaráð Norðurþings hefur fyrir sína parta afgreitt erindi Maríu Bjarkar með neikvæðum hætti á fundi sínum í vikunni: „Byggðarráð þakkar N4 fyrir erindið en telur sér ekki fært að gera svo viðamikinn samning við einn fjölmiðil,“ segir meðal annars í fundargerð. Sama máli gegnir um Akureyrarbæ: „Bæjarráð þakkar gott boð og góða umfjöllun um svæðið en getur ekki orðið við erindinu að þessu sinni.“

Og að endingu er það Fjallabyggð en í fundargerð frá 3. þessa mánaðar segir að Fjallabyggð sé sem stendur í verkefni með N4 og hyggst klára það áður en farið verður í frekari verkefni, eins og það er orðað. Bæjarráð Fjallabyggðar ályktar og leggur til við Alþingi og ríkisstjórn í ljósi þess að ákveðið hefur verið styrkja einkarekna fjölmiðla, „að tryggja og skilyrða ákveðið fjármagn til fjölmiðlunar og dagskrárgerðar á landsbyggðinni. Einnig hvetur bæjarráð Fjallabyggðar stjórnvöld til þess að skattleggja sérstaklega auglýsingatekjur erlendra streymisveitna og tryggja þannig nauðsynlegt fjármagn til innlendrar dagskrárgerðar.“