Íslenski flugstjórinn birtist óvænt og bar fram bónorð

Flugstjórinn og Húnvetningurinn Róbert Lee Evensen og kærasta hans, sem er frá Nuuk, höfðu ákveðið að eyða jólunum saman í höfuðstað Grænlands og vissi hún ekki betur en að hann ætlaði að taka á móti henni á flugvellinum, samkvæmt frásögn grænlenska miðilsins KNR. Kvöldið áður fékk kærastinn hins vegar aðra og stærri hugmynd, eins og sjá má á myndbandi sem Air Greenland birti á facebook-síðu sinni.

Strax um morguninn hóf Róbert að kanna hvort unnt væri að koma þessu í kring og þurfti til þess aðstoð fjölda samtarfsmanna. Síðast en ekki síst þurfti hann að skipta á vakt við félaga sinn svo hann gæti annast flugið.

Flugið gekk þó tíðindalaust þar til eftir lendingu í Nuuk þegar verið var að stöðva hreyflana við flugstöðina. Þá heyrðist rödd í hátalarakerfinu:

„Þetta er flugstjórinn sem talar. Við erum ekki alveg búin ennþá. Vinsamlegast sitjið aðeins lengur í sætunum.“

Takið svo eftir viðbrögðum konunnar í annarri sætaröð vinstra megin þegar flugstjórinn andartaki síðar kemur út úr klefanum með jólasveinahúfu á höfði og fer í hátalarakerfið:

„Kæru gestir. Velkomnir til Nuuk. Ég er með mikilvæga tilkynningu. Það er nefnilega þannig að við erum með mjög sérstakan farþega með okkur. Það er Michala Hansen sem situr í sæti 2B.

Við höfum eitt vandamál. Það er þannig að hún er „bara“ kærastan mín, svo við verðum að gera eitthvað í því. Og því vil ég gjarnan spyrja þig, Michala,“ segir hann um leið og hann teygir segir eftir hringnum í vasanum. „Viltu kannski giftast mér?“

„Já, já, það vil ég,“ heyrist hún svara klökk og fagnaðarandvarp fer um farþegarýmið en viðbrögð hennar og annarra flugfarþega má sjá í myndbandinu:

Þess má geta að Róbert Evensen er fæddur árið 1981 á Blönduósi þar sem hann ólst upp. Foreldrar hans eru Þorvaldur Evensen og Charlotta Evensen, sem er færeysk, en þau búa núna í Garðabæ.

Róbert tók stúdentspróf frá Menntaskólanum á Akureyri og hóf störf hjá Air Greenland eftir atvinnuflugmannspróf. Hann starfaði um tveggja ára skeið hjá Wow Air en þegar það lagði upp laupana færði hann sig aftur yfir til Air Greenland þar sem hann hefur verið flugstjóri síðustu tvö ár. 

Róbert er búsettur í Kaupmannahöfn, ásamt kærustu sinni, en flýgur reglulega til Grænlands þar sem hann tekur þriggja vikna vinnutarnir, að sögn Þorvaldar föður hans.