Stjörnu­lífið: Bón­orð, glimmer og mið­nætur­kossar

Listaparið Þórdís Björk Þorfinnsdóttir og Júlí Heiðar Halldórsson trúlofuðu sig í annað sinn. Júlí bað Þórdísar í maí á síðasta ári en Þórdísi fannst Júlí þurfa að fá hring líka, svo hún skellti sér á skeljarnar á miðnætti þegar nýtt ár gekk í garð.

Athafnakonan Birgitta Líf Björnsdóttir segist hafa átt sitt besta ár til þessa. Hún tók á móti nýju ári með kærasta sínum Enoki Jónssyni.

Leikkonan Saga Garðarsdóttir, yfirhöfundur Áramótaskaupsins fagnaði nýju ári og vel heppnuðu skaupi.

„Nýtt ár, ný tækifæri,“ skrifar fjölmiðlakonan Ragnhildur Steinunn Jónsdóttir.

Áhrifavaldurinn Sunneva Einarsdóttir hélt upp á áramótin í Flórída. Hún var glæsileg að vanda, í silfurlituðum kjól með uppsett hárið.

Tónlistarkonan Bríet óskaði fylgjendum sínum gleðilegs árs. Bríet söng lokalagið í Áramótaskaupinu sem vakti mikla lukku.

Leikkonan Nína Dögg Filippusdóttir er ein þeirra sem sæmd var heiðursmerki hinnar íslensku fálkaorðu á Bessastöðum á nýársdag. Nína segist ganga hrærð, þakklát og spennt inn í nýtt ár.

Fegurðardrottningin Fanney Ingvarsdóttir segir árið 2022 hafa verið dásamlegt að mestu leyti. Á árinu útskrifaðist hún úr stafrænni markaðsfræði og hóf störf sem markaðsfulltrúi Bio Effect.

Athafnakonan Brynja Dan sprengdi burt árið 2022 í glimmer dressi og moonboots.

Listaparið Íris Tanja Flygenring og Elín Ey fóru inn í nýtt ár saman.

Hildur Björnsdóttir, borgarfulltrúi Sjálfstæðisflokksins, hélt að árið 2023 yrði rólegra en árið á undan en þá kom í ljós að hún væri ófrísk. Hún á von á stúlku með eiginmanni sínum Jóni Skaftasyni og er stúlkan þeirra fjórða barn.

Leikkonan Helga Braga Jónsdóttir fór á kostum í Áramótaskaupinu. „Afsakið innilega þennan performans minn í Skaupinu, aumingja þið að þurfa horfa á þetta,“ skrifar Helga á Instagram og vísar hún þar í persónuna sem hún lék sem baðst stöðugt afsökunar á tilvist sinni.

Tónlistarmaðurinn Daði Freyr tilkynnti að von væri á nýrri plötu á nýja árinu.

Dansarinn Ástrós Traustadóttir er þakklát fyrir liðið ár. Hún er þó full tilhlökkunar fyrir nýju ári þar sem hún á von á sínu fyrsta barni.

„Samningar hafa náðst fyrir 2023,“ segir athafnakonan Camilla Rut.

Forsetahjónin Guðni Th. Jóhannesson og Eliza Reid fögnuðu nýju ári á Bessastöðum.

Ljósmyndarinn Helgi Ómarsson og kærasti hans Pétur Svensson geisluðu á gamlárskvöld.

Leikkonan Nanna Kristín Magnúsdóttir segir árið 2022 hafa verið alls konar en er þakklát fyrir reynsluna.

Það var veður fyrir leður hjá tónlistarmanninum Emmsjé Gauta.

Samfélagsmiðlastjarnan Katrín Edda Þorsteinsdóttir segir árið 2022 hafa verið árið sem toppaði öll önnur. Hún gifti sig, byrjaði í nýrri vinnu og eignaðist sitt fyrsta barn eftir að hafa glímt við ófrjósemi.

Það var glimmer og glamúr hjá Felix Bergssyni og Baldri Þórhallssyni á gamlárskvöld.

Leikkonan Aldís Amah sendi nýárskveðju og hvatti fólk til þess að fara ekki út í öfgar í áramótaheitunum. Eitt af áramótaheitum Aldísar er að vera einlægari með sína bresti.

Förðunarfræðingurinn Erna Hrund Hermannsdóttir segir árið 2022 hafa verið mikið lærdómsár. Hún lærði betur á sjálfa sig og endurskoðaði margt. Þá eignaðist hún sitt þriðja barn á árinu.

Tónlistarkonan Svala Björgvins fer inn í nýtt ár með hjartað fullt af þakklæti, auðmýkt og kærleika.

Leikkonan Aníta Briem er stolt af öllum þeim verkefnum sem hún tók þátt í á árinu 2022.

Tískubloggarinn Elísabet Gunnarsdóttir glitraði á gamlárskvöld. Árið 2022 mun eiga sérstakan stað í hjarta hennar þar sem hún eignaðist sitt þriðja barn, dótturina Önnu Magdalenu, á árinu.