Sex hundruð Úkraínu­menn á jóla­balli í Vestur­bænum

Samtökin Flotta fólk halda í dag jólaball fyrir úkraínska flóttamenn í samfélagshúsinu á Aflagranda 40. Sveinn Rúnar Sigurðsson, talsmaður samtakanna, segir að um sé að von sé á stórum hópi á ballið.

„Við reiknum með um 400 flóttamönnum og tvö hundruð börnum. Þau koma hér í íslenskan jólamat, fá pakka og nammipoka. Íslenskir og úkraínskir jólasveinar mæta og spiluð verða íslensk og úkraínsk jólalög í bland,“ segir Sveinn Rúnar í samtali við fréttastofu. 

Samtökin hafa staðið haldið hátt í tvö hundruð viðburði það sem af er ári, en að sögn Sveins væri enginn af þeim möguleiki ef ekki væri fyrir samstöðu og kærleika þjóðarinnar.

„Þetta hefur alltaf verið kapphlaup við tímann en við tókum þessa ákvörðun fyrir tveimur dögum síðan en núna er hangikjötslykt í loftinu og tæp 100 kíló af kjöti, hundruð lítra af malti og appelsíni og mandarínur, nammi og gjafir frá Íslendingum. Þetta hefur alltaf gengið, það er auðvitað stór hópur sem kemur að þessu. Velvilji þjóðar hefur orðið til þess að eftir að árið er liðið þá hefur verið horft á viðbrögð Íslendinga sem fyrirmynd í þeim efnum hvernig hægt er að búa þessu fólki sem hingað kemur,“ segir Sveinn Rúnar.

Jólin í Úkraínu eru svolítið frábrugðin þeim á Íslandi. Jóladagur er 6. janúar en Sveinn segir að síðustu ár hafi jólin þar í landi breyst. Áhrif vestursins séu að aukast. 

„Ég spái því að fljótlega muni þeir halda meira upp á jólin í desember. Þetta er með öðru sniði en þeir kunna vel að meta okkar siði og við erum að blanda þessu saman í dag,“ segir Sveinn.