Juventus í Evrópudeildina þrátt fyrir tap gegn PSG

Fyrir leikinn var ljóst að PSG og Benfica færu áfram í 16-liða úrslit keppninnar og aðeins spurning hvort liðið næði efsta sætinu. Juventus var fyrir leikinn með jafn mörg stig og Maccabi Haifa og átti á hættu að lenda í neðsta sæti riðilsins sem hefði þýtt að þátttöku þeirra í Evrópu væri lokið á þessu tímabili.

Kylian Mbappe kom PSG yfir í leiknum í kvöld á 13.mínútu. Leonardo Bonucci jafnaði metin í 1-1 á 39.mínútu og þannig var staðan í hálfleik.

Í síðari hálfleik voru það svo gestirnir frá París sem tryggðu sér sigurinn. Nuno Mendes skoraði sigurmarkið á 69.mínútu eftir sendingu frá Mbappe.

Þrátt fyrir tapið fer Juventus áfram í útsláttarkeppni Evrópudeildarinnar þar sem Maccabi Haifa tapaði 6-1 gegn Benfica í hinum leik riðilsins. Sigur Benfica í þeim leik þýðir að þeir tryggja sér efsta sæti riðlsins.

Juventus fer eins og áður segir áfram í Evrópudeildina en árangur liðsins í Meistaradeildinni eru mikil vonbrigði þar sem einu stig liðsins komu í sigurleik gegn Maccabi Haifa á heimavelli.