Notuðu hesta­mennsku sem yfirvarp fyrir kanna­bis­ræktun

Aðalmeðferð í saltdreifaramálinu svokallaða hélt áfram í Héraðsdómi Reykjavikur í gær. Málið varðar annars vegar innflutning mikils magns amfetamínbasa, sem þrír menn eru ákærðir fyrir, og hins vegar umfangsmikla kannabisræktun á sveitabænum Hjallanesi við Hellu, sem fjórir eru ákærðir fyrir.

Þeir Halldór Margeir og Guðjón Sigurðsson eru ákærðir í báðum liðum en Ólafur Ágúst Hraundal og Geir Elí Bjarnason fyrir kannabisræktunina.

Í vitnisburði lögreglumanna sem rannsökuðu málið kom fram að talið væri að þeir Halldór Margeir og Ólafur Ágúst hafi verið eigendur ræktunarinnar en þeir hafa báðir verið umsvifamiklir í fíkniefnaviðskiptum í fjöldamörg ár og hafa hlotið þunga dóma fyrir slíkt. 

Guðjón hafi aðeins verið eigandi hússnæðisins þar sem ræktunin fór fram og daglegur umsjónarmaður kannabisplantanna. Geir Elí hafi svo verið einhvers konar sérfræðingur að sunnan. Hann hafi komið að Hjallanesi þegar Guðjón vantaði aðstoð með fræðilega hlið kannabisræktunnar. 

Fjórmenningarnir hafi svo allir komið að því að klippa niður og þurrka kannabisefnin.

Fylgdust með á hverjum degi í rúma fjóra mánuði

Af vitnisburði lögreglumanna, sem báru vitni fyrir dómi í gær, að dæma var rannsókn málsins gríðarlega umfangsmikil. Eftir að vísbendingar bárust um að ræktunarbúnaður væri geymdur á Hjallanesi hófst rannsókn lögreglu á sveitabænum. Þegar pallbíll í eigu bílasölu, sem Ólafur Ágúst hafði umráð yfir vegna fyrirhugaðra kaupa, sást við rannsóknina fóru spjótin að berast að honum og aukinn kraftur var settur í rannsóknina.

Bílasalan heldur einnig uppi vörnum í málinu og mótmælir upptökukröfu ákæruvaldsins vegna bílsins enda hafi kaupunum verið rift.

Þá hófst reglubundið eftirlit með Hjallanesi. Lögreglumenn fóru að bænum á hverjum einasta degi á tímabilinu 10. febrúar til 20. maí. Framanaf beindist grunur lögreglunnar að þeim Guðjóni, Ólafi Ágústi og Geir Elí. Fyrir lá að Guðjón var eigandi Hjallaness og hina tvo sáu lögreglumenn reglulega koma að bænum.

Lögreglumaður sem sinnti eftirliti sagðist til að mynda hafa séð Ólaf Ágúst reglulega koma að bænum á fyrrnefndum pallbíl og bera inn úr honum alls kyns varning. Þá hafi hann stundum snúið aftur að bílnum með stóra svarta ruslapoka sem í virtust vera stórar hvítar tunnur. Við rannsókn málsins fundust eins hvítar tunnur fullar þurrkuðu kannabisefni.

Tóku upp mynd og hljóð í skemmunni

Lögreglan beitti öllum tiltækum ráðum við rannsókn málsins og fékk heimild fyrir skyggingu og mynd- og hljóðeftirliti á Hjallanesi, svo eitthvað megi nefna. Lögreglumenn náðu að koma fyrir myndavélum og hljóðnemum inni í skemmunni þar sem ræktunin fór fram. Á myndskeiðum sjást mennirnir fjórir meðal annars koma saman í ræktuninni og klippa niður plönturnar. Þá fyrst þegar það myndskeið var skoðað kom Halldór Margeir inn í myndina.

Lögreglumaður sem vann skýrslu upp úr því sem sjá mátti á myndskeiðinu bar fyrir dómi að svo virtist sem Halldór Margeir hafi stýrt ræktuninni að mestu.

Þá hófst eftirlit með Halldóri Margeiri og skoðað lögregla meðal annars samskipti hans við Guðjón húsráðanda á Hjallanesi. Í þeim samskiptum sem skoðuð voru töluðu mennirnir tveir mikið um hestamennsku. Svo virðist sem þeir hafi talað undir rós um kannabisræktunina með því að nota hugtök tengd hestamennsku. Til að mynda ræddu þeir nauðsyn þess að „fara að járna“ skömmu áður en þeir sáust klippa niður plönturnar, ef marka má framburð lögreglumannsins.

Þá töldu lögreglumenn að þeir hefðu notað slanguryrðið „horaður hestur“ þegar þeir ræddu um saltdreifarann.

Áttu saman stóðhest

Verjandi Halldórs Margeirs spurði lögreglumanninn þá hvort það væri óeðlilegt að tveir áhugamenn um hestamennsku ræddu saman hluti á borð við það að snyrta hófa. Hann benti á að þeir Guðjón og Halldór Margeir stunduðu báðir hrossaræktun og ættu meira að segja saman stóðhest.

„Alls ekki, mjög eðlilegt,“ svaraði lögreglumaðurinn og játti því einnig að sennilega hefðu Guðjón og Halldór Margeir þekkst frá árinu 2016, löngu áður en kannabisræktun á bæ Guðjóns hófst.

Fréttin hefur verið leiðrétt. Upphaflega stóð að pallbíll sá sem Ólafur ók að Hjallanesi hafi verið í eigu félags í hans eigu.