Það var lítil spenna í leik kvöldsins en heimamenn í Ribe-Esbjerg voru átta mörkum yfir í hálfleik, staðan þá 17-9. Yfirburðirnir héldu áfram í síðari hálfleik og var munurinn kominn upp í tíu mörk þegar flautað var til leiksloka, staðan þá 35-23.
Ágúst Elí Björgvinsson átti einkar góðan leik í marki heimamanna en hann varði 14 skot eða 39 prósent þeirra skota sem rötuðu á markið frá Nordsjælland. Elvar Ásgeirsson skoraði tvö mörk og Arnar Birkir Hálfdánarson skoraði einnig tvö mörk.
Var þetta annar sigur Ribe-Esbjerg í fyrstu þremur umferðum deildarinnar. Liðið er jafnt Kolding og Bjerringbro/Silkebog í fimmta til sjöunda sæti.
