Akademias festir kaup á Tækninámi

í fréttatilkynningu um kaupin segir að Tækninám búi yfir einu besta Microsoft kennsluefni á Íslandi auk þess að hafa verið leiðandi í kennslu á þessum almenna hugbúnaði undanfarin sjö ár.

Tækninám mun renna inn í Akademias og verða eftir það um 35 rafrænir áfangar í boði í ofanálag við það úrval námskeiða sem Akademias býður nú þegar upp á.

„Með því að fá Tækninám inn til okkar erum við að bæta við þjónustu til okkar viðskiptavina. Þetta þýðir fyrst og fremst að við munum auka verulega framboð og gæði á námsefni fyrir Microsoft lausnir, sem er mikilvæg viðbót við þann risastóra kubbakassa sam fræðslusafnið okkar er orðið en við erum sífellt að bæta í eftir þörfum viðskiptavina. Þetta gerir atvinnurekendum kleift að veita starfsmönnum aðgang að fræðslu meðfram vinnu en einnig að raða saman mismunandi áföngum sem mynda lærdómsferli eða spretti, sem taka á þeim raunverulegum áskorunum innan fyrirtækja og stofnanna. Eins og t.d innleiðingu á nýjum kerfum, koma í veg fyrir streitu og kulnun og hjálpa starfsfólki með verkefnastjórnun, skipulag og markmiðasetningu,” er haft eftir Guðmundi Arnari Guðmundssyni, framkvæmdastjóra Akademias í fréttatilkynningunni.

Texta kennsluefnið fyrir fólk með annað móðurmál en íslensku

Þar segir að Akademias sé leiðandi í rafrænni fræðslu og eigi þá þegar stærsta safn af rafrænu fræðsluefni á Íslandi sem fyrirtæki og opinberir aðilar geta fengið aðgang að. Áfangarnir sem boðið sé upp á séu tæplega eitt hundrað talsins.

Þeim fjölgi um þrjá til fjóra í hverjum mánuði og nú þegar sé hafin vinna við að texta þá svo fólk með annað móðurmál en íslensku geti jafnframt eflt sig á vinnumarkaði. Atvinnurekendur geti fengið áfangana inn í sín eigin kennslukerfi eða veitt öllu starfsmönnum aðgang í gegnum kennslukerfi Akademias.

Tækninám var fyrir kaupin í eigu Sigurjóns Hákonarsonar og Hermanns Jónssonar og mun Hermann taka sér stöðu innan Akademias á næstu misserum en Sigurjón kveður við kaupin.