Fann­ey úr bak­vinnslunni í þjónustu­stjórann hjá Póstinum

Í tilkynningu frá Póstinum segir að helstu verkefni þjónustustjóra eru að leiða þjónustuverið, hafa eftirlit með gæðum þjónustunnar, að veita tæknilega aðstoð og ráðgjöf til viðskiptavina, innleiða breytingar og ný verkefni og annast verklag ásamt margvíslegum samskiptum við viðskiptavini og samstarfsaðila. 

 „Það er frábært að taka við starfi þjónustustjóra á þessum tímapunkti. Fyrirtækið er í mikilli sókn og það eru spennandi tímar fram undan. Ég hlakka til að takast á við þau fjölbreyttu verkefni sem við þurfum að ráðast í á sviði þjónustu ásamt því að annast dagleg störf með mínu dásamlega þjónustuveri og frábæra samstarfsfólki á öllu landinu. Það er svo magnað þetta fólk sem vinnur hjá Póstinum, alltaf boðið og búið að þjónusta innri og ytri viðskiptavini af alkunnri snilld,“ segir Fanney. 

 Fanney er sögð hafa mikla þekkingu á starfsemi Póstsins enda hefur hún starfað hjá fyrirtækinu síðan í ágúst árið 2004. 

„Fanney hefur sérstaklega dýrmæta reynslu af þjónustu við viðskiptavini sem mun áfram reynast mjög mikilvæg í þeim stóru verkefnum sem eru á teikniborðinu. Fanney og hennar fólk í þjónustuverinu á Akureyri gegna lykilhlutverki í því að rödd viðskiptavina heyrist hátt og vel þegar kemur að vörum og þjónustu Póstsins, enda teymið sem er alltaf í samtali við viðskiptavini.“ segir Ósk Heiða Sveinsdóttir, forstöðumaður þjónustu og markaðar hjá Póstinum. 

„Leiðtogar eins og Fanney eru ekki á hverju strái og ég er full tilhlökkunar að vinna áfram með Fanneyju og njóta krafta hennar á nýjum vettvangi.“