Fjölmargir farnir með feng sinn eftir „vel heppnuð“ kaup í Ís­lands­banka

Þetta kemur fram í umfjöllun Kjarnans sem hefur borið saman lista yfir kaupendur að hlut Íslandsbanka sem var birtur á miðvikudag síðastliðinn og svo lista yfir hluthafa bankans eins og hann var við lok dags í gær.

Eins og fram hefur komið og fjallað hefur verið ítarlega um hefur gagnrýni á söluna verið harðlega gagnrýnt. Meðal þess sem nefnt hefur verið í því sambandi er að stefnt hafi verið að því að fá að borðum fjárfesta sem yrðu kjölfestufjárfestar, ættu hlut til lengri tíma en ekki að um yrði að ræða brask með bréfin. En nú hafa sem sagt fjölmargir leyst til sín þann hagnað sem fólst í því einu að kaupa bréfin með afslætti. 

Páll Magnússon vakti í vikunni athygli á einu slíku dæmi af kunningja sínum sem tók snúning og græddi á tá og fingri meðan hann svaf. Ef marka má Kjarnann var hann ekki einn um það.

Erlendu sjóðirnir fljótir að forða sér með feng sinn

Í Kjarnanum segir að þessir aðilar hafi samanlagt keypt fyrir 18,7 millj­arða króna í útboð­inu þann 22. mars síð­ast­lið­inn, en útboðs­gengið var 117 krónur á hlut sem var 4,1 pró­sent lægra en mark­aðs­gengi þess dags.

„Frá því að greitt var fyrir bréfin 28. mars hefur gengi bréfa í Íslands­banka verið lægst 126,8 krónur á hlut og hæst 130,2 krónur á hlut. Miðað við það hefur þessi 132 aðila hópur hagn­ast um 1,6 til 2,1 millj­arða króna á því að taka þátt í hinu lok­aða útboði og selja bréfin aftur skömmu síð­ar,“ segir í Kjarnanum.

Í umfjöllun miðilsins kemur fram að þeir erlendu sjóðir sem fengnir voru til að taka þátt séu, þeir sem sölu­ráð­gjafar Banka­sýslu rík­is­ins buðu að taka þátt í lok­aða útboð­inu, þeir séu flestir búnir að selja allan sinn hlut. Þar er um að ræða sjóði sem einnig tóku þátt í almenna útboðinu í fyrrasumar og seldu sig þá strax út aftur með umtalsverðum hagnaði. Þeir eru nú að taka snúning númer tvö á einkavæðingu ríkisstjórnarinnar.

Söluráðgjafarnir búnir að selja

Þá segir ennfremur að flestir „litlu“ fjárfestarnir séu búnir að leysa út sinn hagnað en alls fengu 59 aðilar að kaupa fyrir undir 30 millj­ónir króna og 79 fyrir minna en 50 millj­ónir króna.

„Gagn­rýnt hefur verið að fjár­festar sem kaupa fyrir svo lágar upp­hæðir fái afslátt í gegnum lokað útboð. Engin ástæða er fyrir því að lokka þá sér­stak­lega inn í eig­enda­hóp­inn í gegnum slíka sölu­að­ferð heldur geti þeir keypt á eft­ir­mark­aði eins og aðr­ir.“

Í Kjarnanum segir að meðal þeirra sem ekki eru lengur skráðir fyrir hlut í Íslands­banka séu starfs­menn og eig­endur sölu­ráð­gjafa sem ráðnir voru til að sinna útboð­inu.