Ók á móti umferð frá Garðabæ að Kópavogi og olli slysi

Skömmu fyrir miðnætti í gærkvöldi var tilkynnt um bíl á Hafnarfjarðarvegi sem var ekið á móti umferð en ökumaður bílsins hafði ekið frá Garðabæ að Kópavogi, þar sem hann hann stöðvaði eftir að hann olli umferðarslysi.

Ekki kemur fram í dagbók lögreglu hvort einhver hafi slasast en ökumaðurinn var handtekinn, grunaður um akstur undir áhrifum áfengis. Maðurinn var vistaður í fangageymslu lögreglu að lokinni sýnatöku fyrir rannsókn málsins.

Ölvaðir einstaklingar í miðbænum handteknir

Á öðrum tímanum í nótt þurfti lögregla síðan að hafa afskipti af erlendum ferðamanni í miðbænum en hann var ölvaður og hafði verið til ama inni á veitingastað. Þá hafði hann „kastað af sér þvagi utandyra,“ eins og það er orðað í dagbók lögreglu.

Maðurinn reyndi að hlaupa frá lögreglumönnum þegar þeir höfðu afskipti af honum en hann var að lokum handtekinn og færður á lögreglustöð. Hann hefur verið kærður fyrir brot á lögreglusamþykkt og að fara ekki að fyrirmælum lögreglu.

Um hálftíma síðar var síðan ofurölvi kona handtekin í miðbænum en hún var vistuð sökum ástands í fangageymslu lögreglu.

Slys við veitingahús og eldur í undirgöngum

Á svipuðum tíma var tilkynnt um slys við veitingahús í miðbænum en maður hafði þar dottið á bakið í tröppum og slasast þegar höfuð hans skall í gangstéttina. Hann var fluttur með sjúkrabíl á bráðamóttöku en ekki kemur fram í dagbók lögreglu hversu alvarlega maðurinn slasaðist.

Þá var tilkynnt um eld utandyra við íbúðarhúsnæði í miðbænum þar sem búið var að kveikja í rusli í undirgöngum og sagður mikill svartur reykur. Að því er kemur fram í færslu slökkviliðs höfuðborgarsvæðisins hafði verið kveikt í dýnu við Grettisgötu. Slökkvistarf gekk vel en sótskemmdir eru sagðar vera á veggjum.