Stjarnan í undanúrslit Lengjubikarsins

Stjarnan og ÍA mættust í leik þar sem ljóst var að sigurvegarinn myndi fara í undanúrslit Lengjubikarsins. Stjarnan tók forystuna þegar rúmar tíu mínútur voru eftir af fyrri hálfleik, hinn ungi Adolf Daði Birgisson með markið.

Segja má að Emil Atlason hafi svo gert út um leikinn í upphafi síðari hálfleiks þegar hann kom Stjörnunni í 2-0. Emil bætti svo við sínu öðru marki og þriðja marki Stjörnunnar á 76. mínútu leiksins og þar við sat, lokatölur 3-0.

Þar með er ljóst að Stjarnan er komin í undanúrslit þar sem FH bíður. Íslands- og bikarmeistarar Víkings mæta KR í hinum undanúrslitaleiknum.