Tvær hafnarborgir í suðurhluta Úkraínu á valdi Rússa

Fregnir berast af blóðugum bardögum og miklu mannfalli í hafnarborgunum Kherson norðvestur af Krímskaga og Mariupol norðaustur af Krímskaga. Báðar eru borgirnar mikilvægar og Rússar eru taldir leggja áherslu á að ná öllum suðurhluta Úkraínu á sitt vald allt frá Donbas í austri. Því muni Rússar leggja áherslu á að ná hinni sögufrægu borg Odessa í suðvesturhluta landsins á sitt vald.

Rússar hafa hert eldflaugaárásir sínar á höfuðborgina Kænugarð. Gífurlega fjölmennar hersveitir þeirra halda sig þó enn utan borgarinnar þótt þær nálgist hana smátt og smátt.

Á meðan íbúar helstu borga Úkraínu hafast við í kjöllurum, loftvarnabyrgjum og neðanjarðarlestarstöðvum vegna linnulausra loftskeyta- og stórskotaliðsárása Rússa heldur straumur flóttamanna frá landinu áfram. Nú er talið að fjöldinn nálgist eina milljón manna.

Sergey Lavrov utanríkisráðherra Rússlands talar enn um að markmið innrásarinnar sé að splundra her Úkraínu og afnasistavæða landið. Krímskagi væri óaðskiljanlegur hluti af Rússlandi og hin svo kölluðu alþýðulýðveldi Donetsk og Luhansk í Donbas héraði verði að fá landamæri sem Rússland geti sætt sig við.

„Eftir að þessum átökum sem Úkraínumenn hófu og við erum að reyna að stöðva lýkur, verða Úkraínumenn sjálfir að ákveða hvert þeir stefna í framhaldinu,“ segir Lavrov rétt eins og Rússar gangi göfugra erinda friðar í Úkraínu. Nú væru stjórnmálafræðingar að ræða framtíðarmöguleika Úkraínu. Rússneski stjórnvöld vinni út frá þeirri staðreynd að almenningur í Rússlandi verði að ákveða hvert landið stefni í framtíðinni.

 Á Krím þýddi þessi málflutningur að Rússar skipulögðu þjóðaratkvæðagreiðslu um innlimun í Rússland sem varla fannst maður á móti á öllum skaganum og í framhaldinu varð Krím hluti af Rússlandi.

Hundrað fjörtíu og eitt ríki af 193 aðildarríkjum greiddi atkvæði með fordæmingu Sameinuðu þjóðanna á innrás Rússa í Úkraínu á allsherjarþinginu í gær. Fulltrúar Rússa, Hvítarússlands, Eritreu, Norður Kóreu og Sýrlands greiddu atkvæði gegn tillögunni og 35 ríki, þeirra á meðal Kína sátu hjá. Þrátt fyrir þetta segir Lavrov Rússa eiga öfluga bandamenn.

„Við eigum vini, við eigum bandamenn, við eigum fjölda samstarfsaðila á alþjóðasviðinu sem hafa ekki misst sjálfstæði sitt og getu til að láta þjóðarhagsmuni sína ráða ferðinni. Ólíkt Evrópu og nokkrum öðrum löndum. Bandamenn okkar eru einnig undir miklum þrýstingi,“ sagði Sergey Lavrov í viðtali í gær.