Blaðamennirnir grunaðir um dreifingu á kynferðislegu efni

Í greinagerðinni kemur einnig fram að lögregla telji sig hafa fengið játningu frá einstaklingi tengdum Páli þar sem viðkomandi gengst við því að hafa dreift efni úr síma Páls til fjölmiðla í fyrra. Þar segir jafnframt að kynferðislegt efni hafi verið á síma Páls. Telur lögregla hugsanlegt að blaðamennirnir hafi dreift efninu með öðrum.

Lögregla telur fyrrnefndan einstakling hugsanlega, eins og segir í greinargerðinni, hafa byrlað Páli í ótilgreindu hefndarskyni, tekið síma hans ófrjálsri hendi og komið í hendur blaðamanns. 

Stundin hefur greinargerð lögreglu undir höndum og fjallar um málið á vef sínum. Aðalsteinn Kjartansson, blaðamaður miðilsins, er einn fjögurra blaðamanna sem lögregla segir sakborning í málinu og hefur boðað til skýrslutöku. 

Aðalsteinn ákvað að láta reyna á rétt sinn og tekist er á um það fyrir Héraðsdómi Norðurlands eystra hvort lögreglu sé heimilt að kalla Aðalstein til skýrslutöku.

Heimildarmaðurinn hafi komið í yfirheyrslu í október

Athygli vekur að lögregla skammar blaðamenn í greinargerð sinni fyrir að hafa bæði faglega og fjárhagslega nýtt sér gögn í stað þess að styðja einstaklinginn sem sé mjög viðkvæmur og hugsanlega í hefndarskyni.

„Lögreglan veit hver heimildarmaðurinn er,“ segir í greinargerðinni. Heimildarmaðurinn hafi komið í yfirheyrslu 5. október. 

„Í þeirri skýrslutöku viðurkennir X að hafa óskað eftir að fá að skoða síma brotaþola og þegar hann neitaði því kveðst X hafa snöggreiðst og farið fram og náð í svefnlyf sem hann vissi ekki hvaða tegund var og sett út í drykk brotaþola.“

Þá segir: „X viðurkennir að hafa skoðað innihald síma brotaþola og hafa ekki fengið heimild brotaþola til að gera slíkt. Hann viðurkennir líka að hafa afhent fjölmiðlamönnum símann daginn eftir að flogið var með brotaþola í sjúkraflugi til Reykjavíkur.“

Þá segir lögregla ekki ljóst hvort síminn hafi verið afritaður að hluta eða að öllu leyti en að þeir sem afrituðu símann hafi þurft að skoða allt sem í honum var. 

„Það er ljóst að gögnum úr þessum afritaða síma var dreift á milli fjölmiðlamanna, þ.á.m. hugsanlega kynlífsmyndböndum.”

Kallar kenningu lögreglu samsæriskenningu

Gunnar Ingi Jóhannsson, lögmaður Aðalsteins, sagði fyrir dómi að lögregla hefði enga staðfestingu eða sönnun um að kynferðislegu efni hafi verið dreift meðal fjölmiðla. Hann fullyrti að Aðalsteinn hafi ekki séð síma Páls eða neitt annað efni heldur en skrifað var um.

„Skjólstæðingur minn veit manna best hvað hann gerði og hvað ekki,“ sagði Gunnar Ingi og lýsti hann kenningu lögreglu, að fjölmiðlar hafi dreift kynferðislegu efni sín á milli af símanum, sem samsæriskenningu.

Hann sagði að um veiðiferð af hálfu lögreglunnar hafi verið að ræða og dugi ekki til að beita íhlutun í rétt blaðamanna. Málið hefði ekkert að gera með kynlífsmyndbönd heldur væri um þöggunaraðferðir að ræða.

Eyþór Þorbergsson, saksóknari hjá Lögreglunni á Norðurlandi eystra, hafnaði því að lögregla þurfi rökstuddan grun um meint brot til að rannsókn geti hafist og menn verði kallaðir til yfirheyrslu, aðeins einfaldan grun þurfi til þess. 

Hann fór fram á að kröfunum yrði vísað frá og að dómurinn fallist á það að rannsókn haldi áfram undir stjórn lögreglustjóra.

Fréttin hefur verið uppfærð.