Sjálfstæðisflokkurinn ekki að ganga í Birgi Þórarinsson

Miðflokkurinn stendur eftir sem minnsti flokkur á Alþingi með aðeins tvo menn, formanninn Sigmund Davíð Gunnlaugsson og Bergþór Ólason. Í yfirlýsingu sem stjórn flokksins sendi frá sér á fimmta tímanum er ákvörðun Birgis sögð áfall fyrir öflugan hóp í Suðurkjördæmi sem hafi borið Birgi á örmum sér í kosningabaráttunni. Hann tilkynnti síðan um vistaskiptin tveimur vikum eftir kosningar.

Friðjón Friðjónsson almannatengill og varaþingmaður Sjálfstæðisflokksins segir alltaf gott að auka þingstyrk flokksins en að þeir sem í hann gangi þurfi að laga sig að stefnunni.

Friðjón telur málið snúast um persónur innan Miðflokksins. „Hann vitnaði til einhvers bréfs sem kom fimm dögum fyrir kosningar, sem ég veit ekki nein deili á. Þannig að þetta virðist vera miklu persónulegra heldur en málefnalegra, vegna þess að meðal annars bíður hann ekki eftir því að sjá hvað er í stjórnarsáttmálanum heldur samþykkir hann hann óséðan,“ segir Friðjón.

Hanna Katrín Friðriksson, þingflokksformaður Viðreisnar, segir að málið líti ekki vel út: 

„Ég verð bara að segja, ég dauðvorkenni kjósendum Miðflokksins í þessu kjördæmi og öllum þeim fjölda starfsfólks sem hefur lagt hönd á plóg í þessum kosningum. Þetta er eins og einhver lýsti því: Ekkert annað en hnífstunga í bakið. Þetta er það snemmt og það fyrirséð hjá viðkomandi eða fyrirfram ákveðið, það er engin leið að lesa annað út úr því.“

Birgir þarf að laga sig að flokknum

Stjórnarmyndunarviðræður eru í fullum gangi hjá stjórn sem Birgir hefur talað gegn.

Hanna Katrín: „Þetta eykur þingstyrk flokksins en mér þætti ekki ólíklegt að þetta þrengdi möguleika hans til stjórnarsamstarfs að einhverju leyti. En nóttin er ung, þó að þessi tiltekni þingmaður ferðist með þungan farangur af alls konar forpokaðri afstöðu, allt að því mannfjandsamlegri til ýmissa mála, þá er þetta samt bara einn þingmaður.“

Friðjón: „Hann þarf að aðlaga sig að þeim málum sem Sjálfstæðisflokkurinn og ríkisstjórnarflokkarnir munu leggja áherslu á. Orkuskipti, virðing fyrir mannréttindum og ákveðna afstöðu í mörgum málum sem hann sannarlega talaði mjög einarðlega á móti á síðasta kjörtímabili.“

Hefurðu trú á því að hann geti tekið það stökk? „Það er hans að sanna það, hann er að ganga í Sjálfstæðisflokkinn, við sjálfstæðisfólk erum ekki að ganga í Birgi Þórarinsson,“ segir Friðjón.

Bjarni Benediktsson formaður flokksins hefur ekki gefið kost á viðtali vegna málsins í dag en sagðist í stuttri uppfærslu hlakka til samstarfsins við Birgi. Ráðherrar Vinstri grænna og Sjálfstæðisflokks gáfu ekki kosti á viðtali í dag, ekki frekar en formaður Miðflokksins.

Í viðtali við fréttastofu var Friðjóni Friðjónssyni veitt ráðrúm til að svara spurningunni um stað Birgis Þórarinssonar í Sjálfstæðisflokknum oftar en einu sinni, en ástæðuna fyrir því má sjá hér: