Land­spítalinn hættir að nota hrað­próf

Að­gengi að PCR-prófum sé mjög gott fyrir starfs­menn spítalans alla daga ársins og því þyki ekki á­stæða til að nota jafn­framt hrað­próf „sem eru síðri, hafa skilað bæði falskt já­kvæðum og falskt nei­kvæðum niður­stöðum og eru auk þess vanda­söm í túlkun“ eins og segir í til­kynningunni.

Far­sótta­nefndin hafði um það for­göngu í sumar, þegar fjórða bylgja far­aldursins hófst hér á landi, að inn­leiða notkun hrað­prófa á spítalanum, með þröngum skil­yrðum þó.

Þau hafa verið fram­kvæmd á til­greindum stöðum hjá starfs­mönnum með væg ein­kenni, sem eiga að mæta til vinnu og treysta sér til þess.

Hraðprófin ekki gefið nógu góða raun

„Lær­dómurinn af notkun hr­að­greiningar­prófa í við­kvæmri starf­semi eins og sjúkra­hús­starf­semi hefur verið á þann veg að þau séu síðri kostur en PCR próf,“ segir í til­kynningu far­sótta­nefndar.

„Far­sótta­nefnd ber að leita allra leiða til að vernda starf­semina fyrir því að þangað inn berist smit og niður­staða nefndarinnar eftir u.þ.b. 6 vikna reynslu­tíma er því að hætta að nota þessi próf að svo stöddu.“

Starfs­menn spítalans geta nú sjálfir bókað PCR-sýna­töku í Heilsu­veru og fengið hana fram­kvæmda á Co­vid-göngu­deildinni.

Fleiri starfs­stöðvar spítalans eru þá einnig í stakk búnar til að taka PCR-próf úr starfs­mönnum sínum.