Enn ó­víst hvar miðja bakkans lendir

Lögreglan á Suðurnesjum biðlaði í gærkvöldi til fólks um að fara ekki af stað á vanbúnum bifreiðum, taka ekki óþarfa áhættu og fylgjast vel með færð. Búist er við hríðarveðri á suðvestanverðu landinu og snjókomubakki er nú að ganga inn á land, að sögn Daníels Þorlákssonar, veðurfræðings Vegagerðarinnar.

„Inni í þessum bakka er ákveðinn kjarni sem er með mjög mikilli snjókomu og það verður blint þar en það er ekki gott að segja nákvæmlega hvar hann lendir. Nýjustu spár eru með hann yst á Reykjanesi og í kringum Akranes á Vesturlandi en það þarf lítið að bregða út af svo þetta sé austar og þá jafnvel á Hellisheiði eða jafnvel hér á höfuðborgarsvæðinu með erfiðri vetrarfærð,“ segir Daníel.

Spáin mun skýrast eftir því sem líður á daginn. Þar sem fyrrnefndur kjarni lendir verður ákefðin mest á milli klukkan tvö og sex. Daníel bendir fólki á að fylgjast vel með spám um færð á síðu Vegagerðarinnar. 

„Ef það væri meiri vissa í spám að þá væri mögulega búið að gefa út veðurviðvörun, en þetta er svolítið erfitt að eiga við þetta þar sem maður veit ekki hvort það sé verið að tala um Reykjanesbrautina eða Selfoss. En fólk ætti bara að fylgjast með.,“

Vetrarveður gekk yfir Austurland í gærkvöldi og björgunarsveitarfólk sinnti fjölda verkefna þar sem margir voru á ferli. Ákveðið var að loka veginum yfir Mývatns- og Möðrudalsöræfi vegna veðurs og björgunarsveitir voru þá sendar til að koma þeim sem þar voru þegar staddir til aðstoðar.

„Þar voru ansi margir á ferðinni og tvö ökutæki sem að höfðu lent utan vegar. Farþegarnir sem að í þeim voru voru teknir um borð í björgunarsveitarbíla og þeim var komið til byggða. Á sama tíma fór smárúta af á Fagradal rétt fyrir ofan Reyðarfjörð og við fórum í það verkefni að flytja þaðan fjórtán manns yfir til Egilsstaða,“ segir Jón Þór Víglundsson, upplýsingafulltrúi Landsbjargar.

Jón Þór bendir vegfarendum á að fylgjast vel með aðstæðum í dag.

„Skoða hvernig færðin er, til dæmis inn á umferdin.is og ef þú ætlar að fara yfir fjallveg að vera sæmilega búinn með vel hlaðinn síma og jafnvel skóflu í bílnum. Og ekki hika við að óska eftir aðstoð ef að eitthvað bjátar á.“