Lára Kristín og banda­rískur fram­herji í raðir Vals

Hin 27 ára gamla Lára Kristín gekk í raðir KR fyrir síðasta tímabil en allt gekk á afturfótunum hjá félaginu vegna kórónufaraldursins. Frestanir, smit og fleira sáu til þess að KR sat í botnsæti deildarinnar er mótið var flautað af.

Í vetur hélt Lára Kristín til Ítalíu og samdi við Napolí. Þar lék hún ásamt Guðnýju Árnadóttur sem var á láni frá stórliði AC Milan.

Lára Kristín er nú komin aftur til Íslands og hefur samið við topplið Pepsi Max-deildarinnar, Val. Þar tróna Valskonur með 17 stig að loknum átta leikjum en það er tveimur stigum meira en Íslandsmeistarar Breiðabliks eru með. Ekki kemur fram hversu langur samningurinn er.

Lára Kristín leikur vanalega á miðri miðjunni og hefur komið víða við. Hún hóf ferilinn með Aftureldingu, fór þaðan í Stjörnuna og svo Þór/KA áður en leiðin lá í Vesturbæ Reykjavíkur.

Alls hefur hún leikið 198 leiki hér á landi sem og sex Evrópuleiki ásamt tveimur A-landsleikjum. Þá var hún hluti af liði Stjörnunnar sem varð Íslands- og bikarmeistari árið 2014.

Þá gengur Cyera Hintzen einnig í raðir félagsins. Um er að ræða bandarískan framherja sem hefur leikið með Texas-háskólanum í bandaríska háskólaboltanum.

Pepsi Max deild kvenna er á Stöð 2 Sport en upplýsingar um útsendingar má finna hér. Pepsi Max deildin er hluti af Stöð 2 Sport Ísland sem kostar 3.990 krónur á mánuði en einnig má kaupa útsendingar sem stakan viðburð á 990 krónur.