„Mér líður pínu eins og ég hafi verið að vakna úr dvala“

Fyrir hönd Íslands mun tónlistarkonan Ösp Eldjárn taka þátt.

„Ég er ótrúlega spennt og upp með mér að hafa verið valin til að taka þátt í þessu einstaka verkefni með alveg hreint ótrúlegu tónlistarfólki frá öllum heimshornum. Það er líka sérstaklega dýrmætt að hafa myndað þessi tengsl núna, eftir þetta furðulega ár og mér líður pínu eins og ég hafi verið að vakna úr dvala,“ segir Ösp. 

Tónlistarfólk frá Ástralíu, Bretaníu í Frakklandi, Kanada, Katalóníu á Spáni, Chile, Danmörku, Englandi, Finnlandi, Íslandi, Írlandi, Ítalíu, Noregi, Svíþjóð, Skotlandi, Taívan, Bandaríkjunum og Wales hefur nú verið sett saman í það sem talið er vera stærsta tónlistarsamstarfsverkefni í heimi. Á næstu þrem mánuðum munu þau vinna saman að tónlist yfir samfélagsmiðla.

Fyrirkomulagið fylgir því sem stofnfélögin Sounds Australia, Showcase Scotland Expo og East Coast Music Association (ECMA) í Kanada þróuðu með sér í fyrra en markmið verkefnisins er að stuðla að áframhaldandi uppbyggingu tónlistarfólks innan þjóðlagatónlistar á krefjandi og fordæmalausum tímum COVID-19 heimsfaraldursins. Global Music Match var haldið í fyrsta sinn árið 2020 og fyrir hönd Íslands tóku þátt þau Svavar Knútur, Brek og Ásgeir Ásgeirsson sem bera upplifuninni góða söguna.

Hugmyndin kviknaði í Covid

Alls hefur tónlistarfólkinu verið skipt upp í þrettán teymi sem hvert um sig telja sex einstaklinga hvert frá sínu landi. Á næstu 12 vikum mun hvert teymi vinna svo saman að tónlist, myndbandagerð og öðru efni fyrir samfélagsmiðla. Hver tónlistarmaður fær tvær vikur sem Featured Artist þar sem aðrir meðlimir í teyminu kynna þá fyrir sínum fylgjendum og svo gengur keflið á milli allra innan teymisins út ágúst. Það eru því 78 þátttakendur alls sem starfa samtímis þvert á landamæri, lönd og tímabelti að kynna fylgjendur sína fyrir nýrri tónlist á heimsmælikvarða. Þetta er ómetanlegt á tímum ferðatakmarkana sem höfðu í för með sér að nánast öllum tónleikaferðalögum var frestað eða aflýst.

Hvert teymi er svo leitt áfram af alþjóðlegum þjálfurum sem öll eru stjórnendur þekktra tónlistarhátíða eða kynningarstjórar víðsvegar úr heimi þjóðlagatónlistar. Frekari leiðsögn býðst síðan öllum þáttakendum frá forsprökkum leiðandi hátíða innan stefnunnar á borð við Cambridge Folk tónlistarhátíðarinnar sem haldin er á Englandi, og fleiri sambærilegum hátíðum í Belgíu, Noregi, Ítalíu og um heim allan.

Hugmyndin að verkefninu spratt í heimsfaraldrinum þar sem tónlistariðnaðurinn lamaðist skyndilega og algerlega, og má þá einkum nefna það sem kallast showcase tónlistarhátíðir sem haldnar eru sérstaklega til að koma nýju tónlistarfólki á framfæri og samkomutakmarkanir höfðu sérstaklega slæm áhrif á. Þjóðlagastefnan treystir á tónleikaferðalög til að byggja upp fylgjendur og er Global Music Match því í raun svar stefnunnar við ferða- og samkomutakmörkunum með því að færa þessa tengslamyndun sem á sér stað á tónleikaferðalögum bæði innan stefnunnar en þó einkum til að byggja upp alþjóðlega aðdáendur og þróast áfram sem tónlistarmaður yfir á Covid-vænt form. Reynslan frá 2020 sýnir að ekki nóg með það heldur átti sér stað mikil uppbygging þvert á markaði sem og verulegt aukið alþjóðlegt samstarf og það á erfiðasta ári sem tónleikaiðnaðurinn hefur átt.

Vann á heimatilbúnum hindrunum

Árið 2020 stóð Global Music Match yfir frá ágúst til október og lauk samstarfinu með fjögurra tíma flutningi á samstarfsverkefnunum á Folk Unlocked hátíðinni, en það er rómuð stafræn útgáfa hinnar Bandarísku Folk Alliance International ráðstefnu sem haldin var í febrúar 2021 og er sú stærsta af sínu tagi í heimi. Þetta er einungis eitt dæmi sem sýnir vægið sem Global Music Match hefur haft á alþjóðlega tónlistariðnaðinn sem sýnt hefur verkefninu mikinn áhuga. Á þessum vettvangi voru þau kynnt fyrir hundruðum bókara, dagskrárstjóra, kynna og annars fagfólks innan tónlistariðnaðarins sem fylgist vel með því sem fram fer á þessari ráðstefnu.

Folk Alliance International er aftur samstarfsaðili Global Music Match árið 2021 sem útflutningsaðili og leggur til tónlistarfólk frá Bandaríkjunum. ÚTÓN tekur aftur þátt í verkefninu í ár og heldur utan um íslenska hluta þess en alls taka 13 útflutningsskrifstofur þátt.

„Global Music Match hefur haft mikil áhrif á mig bæði persónulega og faglega. Um leið og verkefnið jók sjálfstraust mitt og efldi tengslanetið, hvatti það mig einnig til að þróa með mér kunnáttu, bæði tæknilega og á nýjum sviðum sem eru dýrmæt í verkfærakistu sjálfstætt starfandi listafólks. GMM opnaði jafnframt fyrir fjölda tækifæra er kemur að tónleikaferðalögum og alls kyns samstarfi um allan heim. Ég eignaðist vini fyrir lífstíð og hef byrjað á nýjum skapandi verkefnum sem ég hefði aldrei treyst mér í áður. Heimurinn getur stundum virkað eins og risastór og ógnvekjandi staður, en í gegnum GMM áttaði ég mig á því að hann getur líka verið þorp, fullt af vinum og nágrönnum sem eru tilbúin að hjálpa hvort öðru. GMM var gríðarlegt þroskaferli og hjálpaði mér að vinna bug á heilmörgum heimatilbúnum hindrunum,“ segir Svavar Knútur, sem tók þátt í Global Music Match 2020.

Varanleg tengsl

„Við erum mjög spennt að sjá Global Music Match fara af stað aftur í næstu viku. Hugmyndin kom fram í Zoom símtali milli mín og Millie Millgate frá Sounds Australia snemma í heimsfaraldrinum í fyrra og síðan þá höfum við séð það fara ört vaxandi og ná til sífellt fleiri útflutningsskrifstofa og tónlistarfólks - sem halda áfram að koma okkur á óvart með jákvæðu viðhorfi og svo brennandi áhuga á þessu tækifæri,“ segir Lisa Whytock, Framkvæmdastjóri Showcase Scotland Expo. 

„Síðastliðið ár hefur allt farið fram yfir samfélagsmiðla - en Global Music Match nær virkilega að nýta þann kraft en einnig velvilja og stuðning sem býr í alþjóðlega tónlistarsamfélaginu og þessum sameiginlegu mörkuðum. Við hlökkum mikið til að sjá hvernig allt tónlistarfólkið mun vinna saman í ár og sjá ný og varanleg alþjóðlegum tengsl nást.”

Global Music Match hefst næstkomandi mánudag þann 6. júní og stendur til 29. ágúst. Nánari upplýsingar er að finna á www.globalmusicmatch.com eða með því að skoða #GlobalMusicMatch á samfélagsmiðlum til að kynnast nýrri tónlist frá 78 þáttakendum í sumar.