Viðskipti innlent

Málverkið af loðnuleitinni teiknast upp á Íslandsmið

Kristján Már Unnarsson skrifar
Leitarferlar skipanna um þrjúleytið í dag. Ljósblár er Árni Friðriksson, gulur er Bjarni Sæmundsson, hvítur er Polar Amaroq, rauður er Aðalsteinn Jónsson og bleikur er Ásgrímur Halldórsson. Takið sérstaklega eftir hvernig ljósblár ferill Árna nær ekki að fylgja fyrirfram ákveðinni leið á Grænlandssundi.
Leitarferlar skipanna um þrjúleytið í dag. Ljósblár er Árni Friðriksson, gulur er Bjarni Sæmundsson, hvítur er Polar Amaroq, rauður er Aðalsteinn Jónsson og bleikur er Ásgrímur Halldórsson. Takið sérstaklega eftir hvernig ljósblár ferill Árna nær ekki að fylgja fyrirfram ákveðinni leið á Grænlandssundi. Hafrannsóknastofnun

Skipaflotinn sem hóf loðnuleitina á mánudag er kominn vel áleiðis með að skanna miðin undan Vestfjörðum og norðurströnd landsins. „Skipin eru öll búin að sjá eitthvað af loðnu. En það er svo sem lítið meira um það að segja,“ segir leiðangursstjórinn Birkir Bárðarson.

Hafrannsóknaskipin Árni Friðriksson og Bjarni Sæmundsson sigldu frá Hafnarfirði og leita núna undan Vestfjörðum. Loðnuskipin þrjú, Ásgrímur Halldórsson, Aðalsteinn Jónsson og Polar Amaroq, sigldu frá Austfjarðahöfnum og eru núna undan Norðausturlandi.

Fylgjast má með leitinni á rauntíma á vef Hafrannsóknastofnunar og þar má sjá hvernig leitarferlar skipanna fimm teikna núna upp litskrúðuga mynd af leiðangrinum, en hvert skip hefur sinn lit.

Árni Friðriksson leggur frá bryggju í Hafnarfirði á mánudag. Höfuðstöðvar Hafrannsóknastofnunar eru í litskrúðuga húsinu vinstra megin.Egill Aðalsteinsson

Athygli vekur að ljósblár ferill Árna Friðrikssonar fylgir ekki fyrirfram útgefnum ferli á Grænlandssundi. Skýringin sést þegar hafískort Veðurstofunnar er skoðað. Hafís hindrar þar leitina og óreglulegur leitarferill sýnir að rannsóknarskipið fylgir ísröndinni. Bjarni Sæmundsson hefur af sömu ástæðu ekki náð að kanna allt svæðið.

„Þetta gengur hratt fyrir sig,“ segir Birkir og vonast til að þessi áfangi klárist á föstudag. Þá lokast veðurglugginn og spáð er brælu.

Hér má sjá frétt Stöðvar 2 frá upphafi leiðangursins á mánudag:

Sjávarútvegur

Tengdar fréttir

Fimm skip kappkosta að finna loðnu á næstu tveimur vikum

Floti fimm skipa, þar af tveggja hafrannsóknaskipa, er að leggja úr höfn til víðtækrar loðnuleitar. Vonir eru bundnar við að niðurstöðurnar verði ávísun á tuttugu til þrjátíu milljarða króna loðnuvertíð á næstu vikum.

Heldur enn í vonina um myndarlega loðnuvertíð

Þriðja árið í röð stefnir í loðnubrest en Hafrannsóknastofnun lagði til í dag að áður útgefinn upphafskvóti yrði afturkallaður. Talsmaður sjávarútvegsfyrirtækja heldur enn í vonina og hvetur til öflugrar loðnuleitar í vetur.



Mest lesið


Fleiri fréttir

Sjá meira


×

Mest lesið