Þriðji þáttur af hlaðvarpinu Kviknar er einstaklega langur en hann hefur yfirskriftina Leyniskjölin. Andrea Eyland þáttastjórnandi segir að þátturinn sé tilvalinn til hlustunar í tveimur hlutum fyrir þá sem hafa ekki mikinn tíma.
Fyrst í þættinum er rætt við Írisi Tönju leikkonu og Hildi Rós kennaranema sem segja frá erfiðri og auðveldri meðgöngu. Í seinni hlutanum talar Elva Björk sálfræðingur um líkamsímynd og virðingu á meðgöngu og í kjölfarið fræðir Sigga Dögg kynfræðingur hlustendur um kynlíf á þessu tímabili og mikilvægi sjálfsfróunar.
Nýjasta þátt af hlaðvarpinu Kviknar má heyra í heild sinni í spilaranum hér að neðan og á öllum helstu efnisveitum.
Sagt að fá sér Cheerios
Íris Tanja er leikkona hjá Þjóðleikhúsinu en hún útskrifaðist úr leiklistardeild Listaháskóla Íslands árið 2016. Íris Tanja er tveggja barna móðir en meðgöngurnar voru mjög ólíkar.
„Á báðum meðgöngum varð ég mjög veik, rosaleg ógleði og uppköst.“
Íris Tanja þjáðist af Hyperemesis Gravidarum, betur þekkt sem HG og kastaði hún þá upp allan sólarhringinn, næstum því alla meðgönguna. En af hverju ákvað hún að leggja þetta á sig aftur, eftir að hafa gengið einu sinni í gegnum svona erfiða meðgöngu?
„Þráin eftir barni er svo sterk að þú ert tilbúin að halda að kannski gerist þetta ekki núna.“
Það reyndist þó ekki rétt og seinni meðgangan var henni mun erfiðari.
„Ég hef bara aldrei verið svona veik. Ég þurfti að fara í veikindaleyfi í vinnunni. Ég kastaði upp allan sólarhringinn og léttist fyrstu vikurnar og þurfti að fá vökva í æð. Ég var sett á lyf.“
Á þeim tímapunkti hafði fólk verið að ráðleggja Írisi Tönju að fá sér Cheerios morgunkorn eða borða áður en hún færi fram úr, sem að sjálfsögðu hafði ekkert að segja við ógleðinni sem hún var að upplifa.
„Allar háræðarnar í kinnunum voru sprungnar, ég var með sprungnar æðar í augunum af því að ég var búin að kasta svo mikið upp og það kom svo mikill þrýstingur í andlitið.“
Föst í aðstæðunum
Á milli uppkasta kúgaðist Íris Tanja stanslaust en hafði ekkert eftir til þess að kasta upp.
„Ég lá bara og gat ekkert gert. Þetta hafði rosalega mikil áhrif á andlegu hliðina líka. Ég fór mjög langt niður og fannst ég föst inni í einhverju sem myndi aldrei klárast. Ég hafði fengið fæðingarþunglyndi með strákinn minn og var í extra áhættu með að fá meðgöngukvíða eða meðgönguþunglyndi.“
Ljósmóðir Írisar Tönju skráði hana því á HAM námskeið í hugrænni atferlismeðferð.
„Ég fann hvað ég var orðin félagsfælin líka því að mér leið svo illa í líkamanum, mér var svo flökurt og ég var svo lítil í mér.“
Fyrir þetta hafði Íris Tanja verið mjög sjálfsörugg og sterk félagslega, bæði á sviði og utan þess.
„Ég fór alveg inn í skelina, varð ofboðslega hrædd og fékk ofboðslega brenglaða hugsun. Mér fannst allir vera að dæma mig.“
Viðtalið í heild sinni má heyra í spilaranum hér fyrir ofan.
Kviknar birtist á Vísi og á öðrum efnisveitum eins og Spotify, aðra hverja viku, á miðvikudögum. Þættirnir verða alls átta talsins auk einhverra aukaþátta og hver þáttur hefur sitt þema. Eldri þætti má finna hér.
Hlaðvarpið Kviknar fjallar um getnað, meðgöngu, fæðingu og sængurlegu. Það fjallar líka um raunina eftir að barnið er komið í heiminn. Eðvarð Egilsson sér um tónlistina í þáttunum en umsjónarkona Kviknar er Andrea Eyland.
