RIFF bætir upp fyrir fráfall Evrópsku kvik­mynda­verð­launanna

„Við vorum farin að hlakka til að taka á móti erlendum gestum okkar í ár og sýna þeim allt það sem við höfum fram á að færa. En þetta er besti kosturinn í stöðunni í ljósi heimsfaraldursins,“ segir Dagur B. Eggertsson borgarstjóri.

Haldin á Íslandi 2022

Frá árinu 1988 hafa Evrópsku kvikmyndaverðlaunin verið afhent árlega við hátíðlega athöfn í þeim tilgangi að vekja athygli á þeim meistaraverkum sem evrópskir kvikmyndagerðarmenn framleiða á ári hverju. Í ár fer athöfnin fram rafrænt frá Berlín en ekki frá Íslandi eins og til stóð. Þau verða vonandi haldin með pompi og pragt á Íslandi í Hörpu árið 2022 ef allt fer að óskum.

„Það er ánægjulegt að samkomulag hafi náðst um að Evrópsku kvikmyndaverðlaunin verði haldin í Reykjavík að tveimur árum liðnum. Þá getum við einbeitt okkur alfarið að því að undirbúa glæsilega hátíð og hliðarviðburði sem við getum nýtt í markaðssetningu á menningarborginni Reykjavík en ekki síður í þágu íslenskrar kvikmyndagerðar og skapandi greina almennt,“ segir Dagur.

Lilja Alfreðsdóttir, mennta- og menningarmálaráðherra, tekur í sama streng. „Við munum halda glæsilega og fjölbreytta hátíðardagskrá til heiðurs evrópskum kvikmyndum, hún verður bara ekki í ár – enda eru nú óvenjulegir tímar sem kalla á sveigjanleika. Þetta er geysilega spennandi tækifæri fyrir íslenska kvikmyndamenningu og kvikmyndageirann hér á landi og við munum nýta það vel,“ segir Lilja.

Bestu EFA myndirnar 2020 að mati RIFF

Úrval kvikmynda sem tilnfefndar eru til Evrópsku kvikmyndaverðlaunanna í ár verða sýndar á streymisveitu RIFF, riff.is, fram til 20. desember. Sýndar verða sex ólíkar kvikmyndir; gamanmynd, spennumynd, drama, teiknimynd og heimildarmynd en myndirnar höfða til mismunandi aldurshópa, ungra jafn sem eldri. Þær eiga það sammerkt að hafa hlotið verðskuldaða athygli undanfarið og þær keppa um eftirsóttu EFA verðlaunin sem afhent verða á laugardag í Berlín. Þetta eru meðal bestu myndanna sem keppa í ár, að mati stjórnenda RIFF, og eru þær meðal annars frá Frakklandi, Danmörku, Rúmeníu, Hollandi, Ítalíu auk Íslands. Myndin Bergmál er fulltrúi Íslands hjá EFA í ár og náði ekki í lokaúrtakið.

THE BIG HIT (Stóri smellurinn)

Eftir Emmanuel Courcol. Frakkland. Tilnefnd sem besta grínmyndin á EFA 2020.

Geðþekkur leikari, Etienne, sem glíma þarf reglulega við atvinnuskort, rekur leiklistarsmiðju í fangelsi þar sem hann fær fangana til þess að setja á svið Beðið eftir Godot eftir Samuel Becket. Horfa á RIFF Heima.

Calamity (Ógæfa)

Eftir Rémi Chayé. Frakkland, Danmörk. Tilnefnd sem besta mynd í flokki hreyfimynda á EFA 2020.

Í Bandaríkjunum árið 1863, leggur hin 12 ára gamla stúlka, Martha og fjölskylda hennar af stað vestur á bóginn í stórri vagnalest í leit að betra lífi. Horfa á RIFF Heima.

Collective

Eftir Alexander Nanau. Rúmenía, Lúxemborg. Tilnefnd sem besta heimildamyndin á EFA 2020

Rannsóknarblaðamaður afhjúpar stóra svikamylllu í rúmverska heilbrigðiskerfinu. Þetta er mynd um vald spilling og lygar í innsta hring. Frábær mynd um blaðamennsku eins og hún gerist best. Horfa á RIFF Heima.

Bergmál (Echo)

Eftir Rúnar Rúnarsson. Ísland, Frakkland, Sviss. Eina íslenska myndin á EFA 2020.

Ísland á aðventunni. Myndin sýnir 56 senur, ljúfar jafnt sem bitrar af nútímalífi okkar hér á Íslandi. Horfa á RIFF Heima.

INSTINCT (Eðlishvöt)

Eftir Halinu Reijn. Holland, Ítalía, Frakkland, Þýskaland. Tilnefnd í flokkunum Uppgötvun ársina á EFA 2020.

Sálfræðitryllir. Þrátt fyrir afar yfirgripsmikla reynslu og þekkingu blindast vel metinn sálfræðingur af ást á kynferðisafbrotamanni sem hún hefur til meðferðar. Horfa á RIFF Heima.

Martin Eden

Eftir Pietro Marcello. Ítalía, Frakkland, Þýskaland. Tilnefnd sem besta Evrópska myndin, besti leikarinn og besta handritið á EFA 2020.

Martin verður ástfanginn af Elenu efnaðri og vel menntaðri konu. Hann dreymir um að verða rithöfundur sem berst fyrir félagslegu réttlæti en gerir sér jafnframt grein fyrir það muni ganga erfiðlega ætli hann að fá á sig hnapphelduna. Horfa á RIFF Heima.