3 dagar í Meistaradeild: Liverpool krækti í hljómsveitarstjóra Evrópumeistaranna

Meistaradeildin í knattspyrnu fer af stað á nýjan leik á þriðjudaginn í næstu viku þegar riðlakeppnin hefst með átta leikjum í riðlum E til H. Vísir ætlar að telja niður í Meistaradeildina og í dag skoðum við leikmanninn sem gæti hjálpað Liverpool að endurheimta bikarinn með stóru eyrun.

Liverpool liðinu tókst ekki að verja Meistaratitil sinn á síðustu leiktíð en liðið féll út á heimavelli í sextán liða úrslitum eftir 3-2 tap á móti Atlético Madrid í framlengdum seinni leik liðanna. Það er samt ríkjandi Evrópumeistari í liði Liverpool á þessari leiktíð.

Liverpool tókst að kaupa Thiago Alcantara frá Bayern München fyrir aðeins tuttugu milljónir punda undir lok gluggans sem þykir ekki mikið fyrir heimsklassa leikmann á þessum tímum.

Thiago hefur unnið 24 titla með liðum sínum og hann vann Meistaradeildina með bæði Barcelona og Bayern München. Hann lærði af Xavi og Guardiola og átti mjög farsælan feril hjá þýsku meisturunum.

Thiago spilaði sinn fyrsta leik með Liverpool aðeins tveimur dögum eftir að hann mætti á Anfield en hann hefur síðan misst af tveimur leikjum eftir að hann greindist með kórónuveiruna.

Thiago var magnaður í sigurgöngu Bayern München á síðustu leiktíð og sýndi meðal annars snilli sína í úrslitaleik Meistaradeildarinnar þar sem hann var svo sannarlega hljómsveitarstjórinn í leik Evrópumeistaranna.

Í úrslitaleiknum gaf Thiago 85 fleiri sendingar eða fleri en allir á vellinum en hann var líka sá á vellinum sem „ryksugaði“ upp flesta lausa bolta (7), fór í flestar tæklingar (3), náði flestum boltum (2) og skapaði flest færi fyrir félaga sína (2).

Það er meira af tölfræði sem sýnir vel leikstjórn hans. Thiago reyndi 64 meðallangar eða langar sendingar í úrslitaleiknum og þær heppnuðust allar. Þá átti hann að minnsta kosti þrjár sendingar á alla leikmenn Bayern liðsins í leiknum. Hann var hjartað í samspili þýska liðsins.

Það var ekki í fyrsta sinn sem Thiago gerir slíkt. Gott dæmi um mikilvægi hans var í leik á móti Tottenham fyrr á Meistaradeildartímabilinu. Tottenham var þá 2-1 yfir í hálfleik þegar þáverandi þjálfari Bayern, Niko Kovac, ákvað að setja Thiago inn á miðju Bayern. Thiago tók yfir miðjuna í leiknum og Bayern vann seinni hálfleikinn 6-1 og þar með leikinn 7-2.

Liverpool er í D-riðli með Ajax frá Hollandi, Atalanta frá Ítalíu og Midtjylland frá Danmörku. Fyrsti leikur Liverpool er á útivelli á móti Ajax á Johan Cruyff Arena í Amsterdam miðvikudagskvöldið 21. október. Sá leikur verður sýndur beint á Stöð 2 Sport 4.

Meistaradeildin verður áfram í beinni á Stöð 2 Sport og þar verða líka Meistaradeildarmessan og Meistaradeildarmörkin á hverju kvöldi sem leikir fara fram í riðlakeppninni. Fyrstu leikirnir í beinni verða Dynamo Kiev-Juventus (Þriðjudagurinn 20. október klukkan 16.45) og PSG-Manchester United (Þriðjudagurinn 20. október klukkan 18.50).