Leyfðu áhorfendur en ekki hólf: Sáum að fólk steig bara undir og yfir borða

Í kjölfar þess að ný auglýsing heilbrigðisráðherra um takmörkun á samkomum vegna kórónuveirufaraldursins tók gildi á föstudag, gátu áhorfendur snúið aftur á íþróttaleiki um helgina.

Sóttvarnalæknir lagði reyndar til í minnisblaði til ráðherra þann 21. ágúst að áhorfendur yrðu bannaðir fram til 10. september. Eftir birtingu auglýsingarinnar, fyrirspurnir frá ÍSÍ og íþróttafélögum, og erindi KSÍ til heilbrigðisráðuneytis, var niðurstaðan þó sú að leyfa áhorfendur með ströngum skilyrðum.

Því mega frá og með nýliðinni helgi 100 fullorðnir vera í hverri stúku á íþróttaleikjum, eða að hámarki 200 fullorðnir áhorfendur á leikjum þar sem tvær aðskildar stúkur eru til staðar.

„Okkur höfðu borist erindi varðandi þetta mál og þessi rök reifuð um að 100 manna samkomur væru leyfðar annars staðar,“ segir Guðrún Aspelund, yfirlæknir á sóttvarnasviði.

„Við töldum rétt að byrja án áhorfenda þegar íþróttirnar fóru aftur af stað [14. ágúst, eftir tveggja vikna bann], og sjá hvernig hlutirnir myndu ganga. Þetta var svo endurskoðað núna þegar nýjasta auglýsingin kom út, með ákveðna sanngirni í huga í sambandi við aðrar samkomur. Það var svo ákveðið að leyfa 100 áhorfendur, en ekki þó þessa hólfaskiptingu sem var áður, og ákveðið að leyfa það strax,“ segir Guðrún.

Vildu sjá hvernig til tækist við að koma íþróttum aftur af stað

Talsverður fjöldi fólks kemur saman á hverjum íþróttaleik þó að áhorfendur séu ekki á svæðinu. Þess vegna var ekki talið rétt að leyfa áhorfendur strax 14. ágúst.

„Það var okkar sjónarmið í upphafi. Að leyfa íþróttir án áhorfenda og sjá hvernig það gengi. Sjá hvernig gengi að koma öllum þessum sóttvarnareglum sérsambandanna í gang, og hvernig félögunum tækist að fylgja þeim. Við áttum góða samvinnu við ÍSÍ um reglurnar. Við höfum miðað við auglýsingarnar og þess vegna var þessi dagsetning fyrir breytinguna. Við hefðum svo sem getað verið ströng með þetta en það voru komnar beiðnir um að leyfa áhorfendur með ákveðnum takmörkunum,“ segir Guðrún.

Sáum að fólk steig bara undir og yfir borða

Þegar áhorfendur voru leyfðir á leikjum fyrr í sumar máttu íþróttafélög skipta sínum áhorfendasvæðum upp og leyfa hámarksfjölda í hverju „hólfi“. Ekki tókst nægilega vel upp við það að mati sóttvarnasviðs:

„Það sem stóð helst í okkur var að með þessari hólfaskiptingu þá myndaðist svolítið mikill fjöldi, þrátt fyrir að það væri hámark á hve margir mættu koma saman. Það varð úr að ekki væri ástæða lengur til að leyfa ekki áhorfendur, ef að aðeins kæmi saman sami fjöldi og er almennt leyfður á samkomum. Við unnum þetta fljótt með ÍSÍ daginn sem auglýsingin kom út,“ segir Guðrún, en það virtist koma ýmsum í knattspyrnuhreyfingunni í opna skjöldu að hólfaskiptingin hefði ekki tekist sem skyldi:

„Það voru ákveðnar efasemdir um það að þetta væri að virka almennilega. Það voru myndir af því og um þetta var fjallað í fjölmiðlum, og við sáum að það voru notaðir borðar til að skilja hólf að en fólk steig bara undir og yfir þá. Það þyrftu þá að vera betri skilrúm til að fólk gæti virt þetta. Í stað þess að 100 manns kæmu saman væri þetta því fljótt að vera 300-400 manna samkoma, og í því fólust áhyggjur okkar. Að ef eitthvað kæmi upp á væri töluverður fjöldi í hættu.

Ég man ekki betur en að það hafi verið umræða um þetta á sínum tíma, og það var ástæða fyrir því að Þórólfur sóttvarnalæknir og Víðir Reynisson skrifuðu sérstakt minnisblað sem var birt, um hólfaskiptingar. Það var gert til að árétta hvað þessi hólfaskipting þýddi, og þetta var einnig til umræðu á upplýsingafundum. Þetta kom því alveg fram, þó að það hafi ekki verið sent eitthvað sérstakt bréf um það,“ segir Guðrún.