Össur hættir við árshátíð um helgina

Stoðtækjarisinn Össur hefur ákveðið að fresta árshátíð fyrirtækisins sem fara átti fram um helgina. Er það gert í varúðarskyni vegna útbreiðslu kórónuveirunnar. Stefnt er að því að árshátíðin fari fram í haust.

Til stóð að árshátíð Össurar færi fram nú á laugardag. Fyrirtækið hafði þegar leigt Listasafn Reykjavíkur auk þess að ráða tónlistarfólk og skemmtikrafta til að halda uppi stuðinu fram á nótt. Nú hefur Össur hins vegar komið því til skila, jafnt til eigin starfsfólks sem og þeirra sem fengin voru til árshátíðarinnar, að fyrirtækið hafi ákveðið að skjóta henni á frest.

Samkvæmt upplýsingum frá talsmanni Össar er það kórónuveiran sem býr að baki ákvörðuninni. Össur sé alþjóðlegt fyrirtæki og starfsmenn ferðist því mikið til og frá landinu vegna vinnu sinnar. „Starfsfólk hefur sýnt þessu skilning en fyrirtækið starfar á heilbrigðissviði og innan þess geira hefur að undanförnu verið gripið til aukinna varúðarráðstafana vegna kórónaveirunnar,“ segir Edda H. Geirsdóttir, upplýsingafulltrúi hjá Össuri.

Þannig segir hún að nokkrir starfsmenn fyrirtækisins hér á landi séu í sóttkví sem stendur, án þess þó að nokkur þeirra sé á meðal þeirra 11 sem hafa greinst með smit hér á landi.

Ekki er búið að ákveða hvenær óhætt verður að bjóða til nýrrar árshátíðar hjá Össuri en Edda segir að horft sé til haustsins. Nánari dagsetning verði ákveðin í samráði vði starfsmannafélagið.

Uppfært 14:30

Í upprunalegu útgáfu fréttarinar sagði að árshátíðin hafi átt að fara fram á Hilton. Hið rétta er að Listasafn Reykjavíkur átti að hýsa árshátíðina. Þetta hefur verið leiðrétt.