Þurftu að kaupa ein­­nota matar­á­höld í þúsunda­tali vegna verk­­fallsins

Forstöðumaður hjúkrunarheimilisins Droplaugarstaða kveðst uggandi yfir stöðu samningaviðræðna Reykjavíkurborgar og Eflingar. Kaupa þurfti einnota diska og hnífapör í þúsundatali á hjúkrunarheimilinu í morgun vegna verkfalls félagsmanna Eflingar hjá Reykjavíkurborg, þar sem ekki hefur fengist undanþága til að vaska upp.

Verkfall Eflingar hófst á hádegi í dag. Embætti ríkissáttasemjara sá ekki ástæðu til að boða samninganefndir Reykjavíkurborgar og stéttarfélagsins til fundar í dag. Enn hefur ekki verið boðað til nýs fundar.

Ekki fengust svör fá embættinu þegar fréttastofa leitaði eftir ástæðum að baki þeirri ákvörðun. Líklegasta útskýringin er þó sú að embættið meti stöðuna þannig að fundur hefði lítil áhrif á gang viðræðna. Takist ekki samningar hefst ótímabundið verkfall aðfaranótt mánudags. Þetta hefur að sjálfsögðu víðtæk áhrif á starfsemi borgarinnar.

Erfið staða

Senda þurfti 3.500 börn heim af leikskólum vegna aðgerðanna í dag. Loka þurfti fjórum leikskólum algjörlega og var leikskólinn Borg í Breiðholti einn þeirra. Foreldrar barna á Borg voru margir uggandi yfir stöðunni þegar fréttastofa náði tali af þeim er þeir sóttu börn sín í leikskólann þegar verkfallið hófst í dag.

„Það er allavega í boði að fá að fara með hana í vinnuna eða taka hana í launalaust leyfi. Ég er bara ekki í þeirri stöðu til að taka launalaust leyfi,“ sagði Sara Mist Jóhannsdóttir, starfsmaður frístundar

Karim Askari, framkvæmdastjóri Stofnunar múslima á Íslandi, sagði stöðuna erfiða. Það væri ekki gott að foreldrar þyrftu að hverfa frá vinnu til að ná í börn sín.

Svanborg Sif Sigmarsdóttir nemi sagði kröfur Eflingarfólks sanngjarnar. Quincy Uzo, starfsmaður Droplaugarstaða, sagði stöðuna ekki góða. Gott væri ef Reykjavíkurborg gæti samið svo starfsfólk leikskólanna fái hærri laun.

„Hvað er réttlátt?“

Verkfallið hafði áhrif á 1.650 notendur velferðarþjónustu borgarinnar. Veittar voru undanþágur fyrir viðkvæmustu þjónustu. Þar á meðal á hjúkrunarheimilinu Droplaugarstöðum. Annars hefði þurft að flytja viðkvæma sjúklinga á sjúkrahús eða til ættingja.

„Við höfum ekki undanþágu til að þvo þvott. Og ekki undanþágu til þess að vaska upp, leirtau og hnífapör og annað slíkt þannig að hér þurfti að kaupa í morgun þúsundir af einnota diskum, glösum, hnífapörum og öðru slíku. Og auðvitað finnst manni það sárt,“ sagði Jórunn Frímannsdóttir forstöðumaður Droplaugarstaða.

Henni líst ekki á blikuna.

„Þetta verður mjög erfitt hérna eftir helgi ef harka færist í hlutina og þetta verður verkfall til langs tíma. Maður er auðvitað svolítið uggandi. Hvað þá? Og hvað er réttlátt? Það er svolítið stóra spurningin í þessu.“

Sorphirða borgarinnar raskast í verkfallinu. Forstöðumaðurinn biður borgarbúa um að huga að flokkun og frágangi.

„Já, bæði þannig að þetta fari ekki að fjúka og komi ekki ólykt og líka fyrir okkur, ef það er gengið þannig frá því, þá erum við fljótari að hirða það þegar við losnum úr þessum deilum,“ segir Sigríður Ólafsdóttir, rekstrarstjóri sorphirðu Reykjavíkurborgar.