Ók á hjólreiðamann og stakk af

Lögreglan á höfuðborgarsvæðinu fékk í gær tilkynningu um að bíl hafi verið ekið á hjólreiðamann í Breiðholti. Ökumaður bílsins fór af vettvangi en hjólreiðamaðurinn hlaut aðeins skrámur og taldi sig ekki þurfa á sjúkrahús, samkvæmt dagbók lögreglu.

Vitni náði þó skráningarnúmeri bílsins og lýsingu af ökumanni hans. Málið er til rannsóknar hjá lögreglunni.

Ölvaður ökumaður var stöðvaður í Grafarvogi í nótt en sá hafði áður verið sviptur bílprófi. Hann hefur ítrekað brotið af sér með þessum hætti. Þá var annar ökumaður stöðvaður við Fiskislóð í gærkvöldi vegna gruns um akstur undir áhrifum fíkniefna.