Næstum því átta ár síðan meistarar fengu stærri skell á heimavelli

HK kom flestum ef ekki öllum á óvart um helgina þegar liðið vann 3-0 sigur Íslandsmeisturum KR á Meistaravöllum í 2. umferð Pepsi Max deild karla.

HK-ingarnir Valgeir Valgeirsson og Jón Arnar Barðdal voru báðir með mark og stoðsendingu í leiknum og á milli marka þeirra skoraði síðan bakvörðurinn Birkir Valur Jónsson.

Það var ekki bara að HK næði að sigra meistarana á þeirra eigin heimavelli heldur einnig það að vinna leikinn með þriggja marka mun.

Íslandsmeistarar hafa mörgum sinnum tapað á heimavelli undanfarin ár og Valsmenn töpuðu meðal annars fjórum sinnum á Hlíðarenda á síðustu leiktíð. Það þarf hins vegar að fara allt til sumarsins 2012 til að finna stærra tap ríkjandi Íslandsmeistara á heimavelli.

Sigur HK á Meistaravöllum á laugardaginn var stærsti sigur liðs á Íslandsmeisturum á þeirra eigin heimavelli síðan að Blikar mættu á sama KR-völl 16. september 2012. Blikar unnu þá 4-0 sigur.

Meðal markaskorara Blika í þeim leik var Kristinn Jónsson sem spilar með KR í leiknum um helgina. Hin mörkin þeirra skoruðu Nichlas Rohde, Elfar Árni Aðalsteinsson og Tómas Óli Garðarsson.

Það voru aftur á móti aðeins tveir leikmenn KR í dag sem tóku líka þátt í hinum skellinum. Aron Bjarki Jósepsson byrjaði báða leikina fyrir KR og Atli Sigurjónsson kom inn á sem varamaður í leiknum fyrir tæpum átta árum.

Rúnar Kristinsson var líka þjálfari KR í þessum leik en aðstoðarþjálfarinn Bjarni Guðjónsson var þá inn á vellinum með fyrirliðabandið.

Óskar Örn Hauksson, fyrirliði KR, var leikmaður KR þetta sumar en hafði þarna verið lánaður til norska félagsins Sandness Ulf.