Bakvörðurinn Hörður Ingi Gunnarsson er genginn til liðs við uppeldisfélag sitt FH eftir að hafa leikið með ÍA síðustu tvö ár.
Í febrúar fullyrti umboðsmaður Harðar í viðtali við Fótbolta.net að ÍA hefði hafnað mettilboði í kappann. Hvað svo sem að til er í því þá varð ekkert af vistaskiptum Harðar þá og fór hann til reynslu hjá norska liðinu Start. Nú er hins vegar ljóst að hann mun leika með FH í sumar en FH greindi frá þessu í kvöld.
FH hefur náð samkomulagi við Skagamenn um kaup á Herði Inga Gunnarssyni. Hann er öflugur bakvörður og fastamaður í u-21 landsliði Íslands.
— FHingar (@fhingar) May 27, 2020
FH þakkar Skagamönnum fyrir fagleg vinnubrögð og óskar þeim alls hins besta í baráttunni í sumar.
Velkominn heim Höddi!#ViðerumFH pic.twitter.com/ToaC4d2NJ6
Hörður Ingi er 21 árs gamall og fór með liði ÍA upp úr 1. deild sumarið 2018 og lék svo með liðinu í Pepsi Max-deildinni í fyrra. Áður hafði hann leikið með HK og Víkingi Ó. en Hörður Ingi er uppalinn hjá FH. Hann á að baki 12 leiki fyrir U21-landslið Íslands og alls 23 leiki fyrir yngri landsliðin.
FH hefur í vetur misst nokkurn fjölda leikmanna en fengið sterka leikmenn í Daníel Hafsteinssyni, Baldri Sigurðssyni og nú Herði Inga.
