Tveir á Landspítalanum vegna Covid-19 en hvorugur á gjörgæslu

Tveir sjúklingar liggja nú inni á Landspítalanum vegna sjúkdómsins Covid-19. Hvorugur þeirra er þó á gjörgæslu.

Þetta kemur fram í nýjum tölum frá farsóttanefnd Landspítalans. Þar segir jafnframt að fjöldi innlagðra sjúklinga í sóttkví sé þrír.

Alls eru ellefu starfsmenn Landspítala í einangrun og 92 starfsmenn spítalans eru í sóttkví. Þá var fjórtán skurðaðgerðum frestað í gær vegna sóttkvíar/einangrunar starfsmanna.

Eftirfarandi segir á vef spítalans um sértækar ráðstafanir/tilmæli á spítalans vegna Covid-19 í dag:

a. Fyrirsjáanleg er verulega skert starfsemi skurðstofa og gjörgæslu vegna einangrunar og sóttkvía starfsfólks. Grípa verður til sérstakra ráðstafana vegna þessa. Tillaga verður um sérstaka útfærslu sóttkvíar tiltekinna starfsmanna í ljósi aðstæðna í samræmi við tillögu sóttvarnalæknis. Útgefið kl. 16:00 í dag.

b. Öllum valaðgerðum sem framkvæma átti á tímabilinu 12.3-15.3 verður frestað, þ.m.t. aðgerðum í samræmi við biðlistátak vegna liðskipta.

c. Rúmum á A-7 fækkað úr 18 í 16 í samræmi við Covid-álag.

d. Matsalir starfa áfram venju samkvæmt. Starfsmenn gæta að vanda ítrasta hreinlætis.

e. Stjórnendur, í samvinnu við forstöðumenn og framkvæmdastjóra, áhættumeta starfsemi sína og grípa til viðeigandi ráðstafana varðandi vinnustöðvar starfsmanna sinna ef ástæða þykir til.

f. Gert er ráð fyrir að við innganga sem opnir eru verði eftirleiðis starfsmenn sem stýri umferð.

g. Ítrekað er að í gildi er það viðmið að einungis starfsmenn sem eru útsettir fyrir Covid-smiti (frá hættusvæðum eða innanlands) þurfi slíka sýnatöku og er þeim sinnt af starfsmannahjúkrunarfræðingum.

Fréttin hefur verið uppfærð.