Sól­veig Anna segir upp­risu lág­launa­kvenna í borginni sannar­lega hafna

Sólveig Anna Jónsdóttir, formaður Eflingar, segir að staðfesta og samstaða samninganefndar Eflingar og félagsmanna hafi skilað þeim samningi við Reykjavíkurborg sem undirritaður var í nótt.

Búið er að aflýsa verkfallsaðgerðum félagsmanna Eflingar í borginni, en ótímabundnar verkfallsaðgerðir félagsmanna hófustu fyrir rúmum þremur vikum.

„Þetta er sannarlega búið að vera langt ferli,“ sagði Sólveig Anna við fréttamann í Karphúsinu þegar búið var að skrifa undir. „Við erum búin að vera í verkfallsaðgerðum nú í ríflega mánuð. En það hefur skilað okkur þessum árangri. Okkar staðfesta, samstaða – bæði samninganefndarinnar og félagsmanna – sem sýndu aftur og aftur að okkur var full alvara og við ætluðu sannarlega að ná fram leiðréttingu á kjörum okkar og það hefur okkur tekist núna.“

Hefur verkföllum verið aflýst?

„Já, verkföllum er aflýst. Kjarasamningar hafa verið undirritaðir.“

Lausnamiðaður andi

Aðspurð um hvað hafi orðið til þess að skriður komst á viðræðurnar segir Sólveig Anna að fólk hafi loks áttað sig á því að það þyrfti að mæta kröfum félagsmanna Eflingar, auk þess að „lausnamiðaður andi“ hafi komið yfir viðræðurnar.

„Sem skilaði þeim árangri að um það bil þrír fjórðu af félagsmönnum Eflingar sem starfa hjá borginni eru að fara að fá einhvers konar leiðréttingu, til viðbótar við hina margumræddu 90 þúsund króna Lífskjarasamningshækkun. Þetta er stór og merkur áfangi og við ætlum að gerast svo djörf að kalla þennan samning sögulegan og kalla sigur okkar sögulegan og segja það bara fullum fetum að upprisa láglaunakvenna sem starfa hér í borginni, hún er sannarlega hafin. Okkar málflutningur hefur skilað okkur þessum árangri. Okkar staðfesta. Og við munum auðvitað halda ótrauð áfram.“

Er þetta betri samningur en þið undirrituðu til dæmis í tengslum við hótelstarfsmenn á síðasta ári?

„Þessi samningur færir okkur það sem við vorum að berjast fyrir, sem er viðurkenning á því að þessar vanmetnu kvennastéttir hafi einfaldlega átt betra skilið en að þeim hafi verið afhent. Og við hljótum að gleðjast djúpt og innilega yfir því að loksins, loksins hafi sá langþráði árangur náðst.“

Er stytting vinnuvikunnar inni í þessu?

„Já, sannarlega er stytting vinnuvikunnar inni í þessu og ýmislegt annað sem skiptir auðvitað mjög, mjög máli.“

Eins og hvað?

„Eins og það til dæmis einstaklingsbundin tækifæri til að fá ýmis viðbótarnámskeið og svo framvegis verða metin. Fólk hefur nú tækifæri til að safna sér inn launuðu námsleyfi og ýmislegt fleira sem skiptir mína félagsmenn mjög miklu máli.“

Ertu sátt við þetta?

„Ég er ekki bara sátt, heldur ótrúlega stolt og þakklát. Ég er auðvitað mjög þreytt eins og aðrir meðlimir samninganefndar.“

Ótímabundið verkfall ykkar hjá Sambandi íslenskra sveitarfélaga hófst í gær. Hvað þýðir þessi samningur fyrir þær samningaviðræður?

„Ég get ekki ímyndað mér annað en að hann þýði það að kröfum okkar sem við höfum sett fram þar, um leiðréttingu, verði líka framkvæmt þar. Að það verði gengið að þeim kröfum,“ sagði Sólveig Anna í nótt.