Björn Ingi sendir líka spurningar á landlækni því hann kemur svo litlu að á fundunum

Björn Ingi Hrafnsson ritstjóri Viljans hefur vakið töluverða athygli á upplýsingafundum almannavarna vegna kórónuveirunnar sem veldur sjúkdómnum COVID-19. Fundirnir eru daglega og hafa verið í nokkrar vikur. Björn mætti ekki á fyrstu fundina en síðan þá hefur hann varla misst úr fund.

Þó nokkuð hefur verið gert grín að hans framgöngu á fundunum á Twitter og ræddi Björn málið í Brennslunni á FM957 í morgun.

„Það er enginn ástæða fyrir því að taka það eitthvað inn á sig þó það sé einhver að gera grín að þessu,“ segir Björn Ingi.

„Það er þvílíkt áhorf á þessa upplýsingafundi á hverjum degi og allir að fylgjast með og það er því ekki skrýtið að þeir sem eru að spyrja veki líka athygli. Ég sleppti fyrstu fundunum en var alltaf með nokkrar spurningar í kollinum sem mig langaði að spyrja og ákvað því að mæta. Eftir það fékk ég heilmikla hvatningu að koma aftur og meðal annars frá skrifstofu landlæknis. Síðan þá er ég búinn að mæta á hvern einasta fund og fæ núna svo mikið af bréfum og fyrirspurnum að ég er ekki einu sinni viss um að ég kæmist upp með að mæta ekki lengur.“

Mun meiri lestur

Hann segist stundum einfaldlega senda bréfin áfram á embættis landlæknis.

„Maður kemur svo litlu að á svona fundum og það er fullt af fólki í samfélaginu sem er búið að senda mér spurningar sem eru engar ýkjur, þetta er bara svona. Það er ekki skrýtið að þegar svona fáránlegir hlutir gerast vakni fullt af spurningum.“

Vefsíðan Viljinn fór í loftið í nóvember 2018. Miðillinn er í eigu foreldra Björns Inga og er Hrafn Björnsson útgefandi. Björn Ingi er sjálfur ritstjóri en efni sem ratar inn á síðuna er að mestu ómerkt. Hluti efnis sem birist á síðunni var lengi vel merkt „Kallinn“ en undanfarnar vikur er efni að mestu merkt ritstjórn. 

Björn segir að lesturinn á Viljanum hafi farið mjög mikið upp eftir að hann tók upp á því að mæta á fundina.

„En hann var líka búinn að fara heilmikið upp áður en ég fór að fara á þessa fundi. Eins og um allan heim hefur aldrei verið jafnmikil notkun á fjölmiðlum þó að auglýsingatekjur séu að hrynja en lestur á netinu er í hæstu hæðum. Það eru allir og amma þeirra að lesa um kórónuveiruna. Ég er búinn að starfa í blaðamennsku í mjög langan tíma og smá saman kemur einhver reynslu og maður fattar hvað á að spyrja út í og hvað ekki. Það kynna sig allir blaðamenn áður en þeir spyrja en af einhverjum ástæðum vekur það meiri athygli þegar ég geri það og það er eitthvað sem ég þarf að lifa með.“

Hann segist vera gríðarlega ánægður með svokallaða þríeyki.

„Ég er þakklátur þeim hvernig þau hafa tekið á þessu. Í fyrsta lagi að vera með svona fundi á hverjum einasta degi. Í öðru lagi hafa þau, í samtali við mig, þakkað fyrir erfiðar spurningar og eru ekki að kvarta undan þeim.“