Jón Ásgeir og Ingibjörg vilja þrjá milljarða í bætur frá Sýn

Þau Jón Ásgeir Jóhannesson og Ingibjörg Pálmadóttir og félag hennar 365 hf. hefur stefnt fjarskiptafyrirtækinu Sýn hf., forstjóra þess og öllum stjórnarmönnum til að greiða þeim alls þrjá milljarða í skaðabætur. Áður hafði Sýn stefnt hjónunum og krafist um 1,7 milljarða króna vegna meintra brota á kaupsamningi.

Greint er frá stefnu hjónanna og 365 í árshlutareikningi Sýnar í dag. Þar kemur aðeins fram að þau hafi stefnt félaginu, Heiðari Guðjónssyni forstjóra og öllum stjórnarmönnum til greiðslu skaðabóta en ekki kemur fram á hvaða forsendum. Þau krefjast eins milljarðs króna hver fyrir sig. Málið er sagt bíða þingfestingar.

Sýn keypti stóran hluta eigna 365 miðla, þar á meðal fjölmiðlana Stöð 2, Bylgjuna og Vísi, í mars árið 2017. Fréttablaðið varð eftir hjá 365 miðlum. Í kaupsamningi var ákvæði um samkeppnisbann.

Í desember sendi Sýn Jóni Ásgeiri, Ingibjörgu, 365 og Torgi, núverandi útgáfufélagi Fréttablaðsins, bréf þar sem þeirri skoðun var lýst að hluti af starfsemi vefmiðils Fréttablaðsins bryti gegn samkeppnisákvæði kaupsamningsins. Það ákvæði veitti rétt til að krefjast dagsekta upp á fimm milljónir króna.

Í árshlutareikningnum sem var birtur í dag kemur fram að Jón Ásgeir og Ingibjörg hafi skuldbundið sig persónulega til að greiða dagsektir ef til brota á samkeppnisbanni kæmi. Dómkrafa Sýnar gegn þeim byggi á dagsektarákvæðum og nemi um 1,7 milljörðum króna auk vaxta. Stefnan hafi verið birt málsaðilum og málið bíði frekari meðferðar.

Uppfært 18:06 Í upphaflegri útgáfu fréttarinnar sagði að Sýn hefði stefnt 365 og Torgi ásamt Jóni Ásgeiri og Ingibjörgu. Bréf sem Sýn sendi í desember vegna meintra samningsbrota var einnig stílað á Torg og 365 en í árshlutareikningi Sýnar nú segir aðeins að þeim Jóni Ásgeiri og Ingibjörgu hafi verið stefnt.

Vísir er í eigu Sýnar hf.