Sam­göngu­sátt­málinn setji lífs­kjara­samninginn í upp­nám

Formenn verkalýðshreyfingarinnar gagnrýna tekjuöflunarleiðir nýs samgöngusáttmála höfuðborgarsvæðisins, sem þeir telja ekki í anda Lífskjarasamninganna sem undirritaðir voru í vor. Forseti ASÍ telur réttar að breiðari bök beri fjármögnun samgöngubótanna, frekar en lágtekjufólk sem hrakist hefur af höfuðborgarsvæðinu.

Af þeim 120 milljörðum sem áætlaðir eru til samgöngusáttmálans mun ríkið leggja til 45 milljarða og sveitarfélög 15 milljarða. Þá er gert ráð fyrir að sérstök fjármögnun standi straum af 60 milljörðum krónum.

Andvirðið á sölu á Keldnalands í Reykjavík mun þannig renna til samgöngubótanna, rétt eins og aukin áhersla á gjaldtöku í umferðinni eins og fjármálaráðherra sagði í samtali við fréttastofu í gær.

„Ég sé fyrir mér að við gerum mikla breytingu á kerfunum yfir tíma samhliða þeim tæknibreytingum sem eru að verða. Að við hættum að tolla svona ríkulega bíla við innflutning til landsins og treystum meira á gjaldtöku vegna notkunar á samgöngumannvirkjunum,“ segir Bjarni.

Þessar hugmyndir mæta þó litlum skilningi meðal forsvarsmanna verkalýðshreyfingarinnar. Drífa Snædal forseti Alþýðusambandsins og Ragnar Þór Ingólfsson formaður VR gjalda þannig bæði varhug við því að sala Keldnalandsins sé hugsuð í þessum tilgangi, landið ætti að nýta til uppbyggingar ódýrs húsnæðis, sem skortir á höfuðborgarsvæðinu. fremur en að nýta það til tekjuöflunar.

„Ef að Keldnalandið verði selt hæstbjóðanda eru mjög miklar líkur á því að það verði enn eitt land- og lóðabraskið sem mun eiga sér stað á húsnæðismarkaði sem síðan skilar sér líklegast, og að öllum líkindum, í allt of háu húsnæðisverði til almennings,“ segir Ragnar Þór og Drífa tekur í sama streng.

„Það er búið að breyta tilganginum frá því sem var, úr því að vera til stuðnings auknum húsnæðisúrræðum í það að vera fjármögnun fyrir samgöngubætur.“

Þetta vinni þannig gegn markmiðum lífskjarasamninganna svokölluðu, sem undirritaðir voru í aprílbyrjun. Þar hafi markmiðið verið að draga úr útgjöldum launafólks, og því sé erfitt að sjá að fyrirhugaðir vegatollar geti samrýmst samningunum.

„Þessar hugmyndir um veggjöld fyrst og fremst vinna klárlega gegn þessu markmiði og stefna lífskjarasamningnum í sjálfu sér í algjört uppnám,“ segir Ragnar Þór.

ASÍ vill því líta til annarra fjármögnunarleiða.

„Það er hægt að sækja peningana þar sem þeir eru, það er hægt að setja hátekjuskatt, það er hægt hækka fjármagnstekjuskattinn, það er hægt að skoða auðlindagjöldin frekar og þá erum við að tala um í víðu samhengi, ferðaþjónustuna og fleira. Það væri nú nær að byrja þar heldur en að skattleggja venjulegt fólk sem er að reyna að komast til og frá vinnu,“ segir Drífa.