Lögreglan í Noregi skaut mann til bana

Maður á sjötugsaldri var í kvöld skotinn til bana af lögreglumönnum í Noregi. Atvikið átti sér stað í smábænum Jaren, norðvestur af Osló.

Heilbrigðisstarfsfólk sem kom til mannsins í heilsufarsvitjun kallaði eftir aðstoð lögreglu í hádeginu í dag.

Eftir um átta klukkustunda samningaviðræður við manninn færðist hasar í leikinn og lögregla þurfti að hleypa af byssuskoti með þeim afleiðingum að maðurinn lést. Þetta kemur fram á vef norska fréttastofunnar TV2. 

Ógnaði lögreglu með sveðju

Pål Erik Teigen, lögreglustjóri, sagði í samtali við VG fréttastofuna, lögreglumenn ekki hafa óttast að atvikið væri svo alvarlegt þegar þeir fóru á vettvang. Enda lögregla er oft kölluð til í slíkum heilsufarsvitjunum.

Þegar á staðinn var komið fór maðurinn að ógna lögreglu með sveðju og sló til lögreglumanna með þeim afleiðingum að einn lögreglumannanna fékk lítinn skurð við augað.

Réðst á lögreglumann með keðjusög

„Við reyndum að ná sambandi við manninn en það var ekki hægt að ná sambandi við hann,“ sagði Teigen.

Lögreglan á vettvangi kallaði eftir frekari liðsauka þar á meðal sérsveitina.

Eftir fjölda tilrauna til að reyna að ná til mannsins meðal annars með notkun piparúða og raflostsvopn ógnaði maðurinn lögreglumanni með keðjusög og var maðurinn skotinn í kjölfarið klukkan 19:45 að staðartíma eða tæpum átta klukkustundum eftir að lögregla kom á vettvang. Hann var úrskurðaður látinn á vettvangi. Málið er í rannsókn.

Teigen segir lögreglu ekki vita hvað manninum gekk til en vitað er að maðurinn var mikill einfari. Jafnframt kemur fram að hann hafi áður komið við sögu lögreglu.