Samþykktu siðareglur á hitafundi

Borgarstjórn samþykkti í gær nýjar siðareglur fyrir borgarstjórn Reykjavíkurborgar. Er þetta gert í samræmi við 29. grein sveitarstjórnarlaga þar sem fram kemur að sveitarstjórn skuli setja sér siðareglur sem skulu birtar opinberlega á vefsíðu sveitarfélagsins eða á sambærilegan hátt. Greint er frá reglunum á vef borgarinnar.

Á fundi forsætisnefndar þann 20. júlí 2018 var samþykkt að hefja endurskoðun gildandi siðareglna og unnið hefur verið að nýjum reglum á vinnufundum borgarstjórnar undir stjórn Sigurðar Kristinssonar prófessors. Vinnuhópur kjörinna fulltrúa vann svo tillögu að nýjum siðareglum.

Hópinn skipuðu Pawel Bartoszek, Örn Þórðarson, Sanna Magdalena Mörtudóttir og Jórunn Pála Jónasdóttir og skilaði hann tillögu að nýjum siðareglum sem lagðar voru fram og samþykktar á fundi borgarstjórnar í gær. 

Um var að ræða mikinn hitafund eins og fjallað hefur verið um og sjá má í spilaranum að neðan. 

Siðareglur kjörinna fulltrúa hjá Reykjavíkurborg

Við vinnum fyrir fólkið í borginni og pössum upp á Reykjavík sem heimili komandi kynslóða.

Við erum heiðarleg, ábyrg, og sýnum gott fordæmi í okkar störfum.

Við kynnum okkur málin og mætum undirbúin til starfa.

Við segjum satt en gætum trúnaðar þegar trúnaður þarf að ríkja.

Við veitum almenningi og fjölmiðlum nauðsynlegar upplýsingar.

Við hugum að því að það sé gott að vinna hjá Reykjavíkurborg.

Við förum vel með fjármuni borgarinnar og eignir hennar.

Við virðum margbreytileikann og vinnum gegn hvers kyns fordómum.

Við sýnum kurteisi, tillitsemi og virðum einkalíf annarra.

Við biðjumst afsökunar á mistökum og hlýðum á afsökunarbeiðnir.

Við erum meðvituð um að við höfum ólíkar skoðanir.

Samþykkt á fundi borgarstjórnar 18. júní 2019.