Már kynnir loksins skýrslu um neyðarlánið

Seðlabanki Íslands hefur boðað til blaðmannafundar í dag í tilefni af útkomu skýrslu um hið svokallaða neyðarlán Seðlabankans til Kaupþings 6. október árið 2008. Fundurinn hefst klukkan 16 og mun Vísir sýna beint frá kynningu Seðlabankastjóra á efni skýrslunnar, en hann boðaði gerð skýrslunnar árið 2015.

Ekki aðeins verða tildrög lánveitingarinar til umfjöllunar á fundinum á eftir, heldur jafnframt eftirmál hennar. Þær fólust meðal annars í tilraun Seðlabankans til að endurheimta andvirði lánsins með því að selja eignarhlut í danska bankanum FIH sem tekinn var að veði fyrir láninu. Bankinn reyndist ekki jafn verðmætur og talið var i upphafi og er áætlað að tap ríkisins af gjörningnum hafi numið um 35 milljörðum króna.

Þrátt fyrir að mikið hafi verið rætt og ritað um neyðarlánið á þeim rúma áratug sem liðinn er frá lánveitingunni er ýmsum spurningum enn ósvarað. Til að mynda hefur ekki enn fengist staðfest hvernig láninu, 500 milljón evrum eða 78 milljörðum króna á gengi þess tíma, var ráðstafað.

Sjá einnig:  Símtal Geirs H. Haarde og Davíðs Oddssonar opinberað: „Ég býst við því að við fáum þessa peninga ekki til baka“

Greint var frá því í bókinni Kaupthinking að 171 milljón evra af neyðarláninu hafi runnið úr Kaupþingi til félagsins Lindsor, sem stýrt var af eigendum bankans. Fjármunirnir hafi verið notaðir til að kaupa skuldabréf útgefin af Kaupþingi af dótturbanka í Lúxemborg. Bréfin höfðu áður verið í eigu fjögurra starfsmanna bankans og taldi Fjármálaeftirlitið að viðskiptin hafi verið framkvæmd til að bjarga þeim frá því að taka á sig mikið tap vegna skuldsettra fjárfestinga sinna.

Hreiðar Már Sigurðsson, þáverandi forstjóri Kaupþings, þvertók hins vegar fyrir það að neyðarlánið hafi verið nýtt í slíka gjörninga. Í grein sem hann birti í Fréttablaðinu skrifaði Hreiðar að „[e]kkert af fjármagninu sem Kaupþing fékk frá Seðlabanka Íslands var notað til kaupa á eigin skuldabréfum Kaupþings eins og haldið hefur verið fram.“

Sem fyrr segir hefst fundurinn í Seðlabankanum klukkan 16 og mun útsending á Vísi hefjast skömmu áður.