Innkalla nýlega Mercedes Benz X-Class

Bílaumboðið Askja hefur innkallað fimmtán Mercedes Benz X-Class bifreiðar af árgerðum 2017 og 2018. Ástæða innköllunarinnar er sú að möguleiki er á að ljós fyrir ofan fætur hjá ökumanni geta losnað.

Að sögn Neytendastofu getur það reynst hættulegt ef ljósið flækist milli bremsupedala og klæðningar. Lagfæringin felist í því að sérstakt límband úr filtefni er sett um ljósið til að tryggja festingu þess. Hringt verður í eigendur bifreiðanna til að gera þeim viðvart um innköllunina.

„Neytendastofa hvetur bifreiðaeigendur til að fylgjast vel með hvort að verið sé að innkalla þeirra bifreiðar og hafa samband við umboðið ef þeir eru í vafa,“ segir á vef stofnunarinnar.