Óskar skipaður forstjóri Heilsugæslu höfuðborgarsvæðisins

Heilbrigðisráðherra, Svandís Svavarsdóttir, hefur skipað Óskar Reykdalsson, sérfræðing í heimilislækningum, sem forstjóra Heilsugæslu höfuðborgarsvæðisins til fimm ára. Frá skipaninni er greint í tilkynningu á vef Heilsugæslunnar.

Óskar er sérfræðingur í heimilislækningum og hefur lokið meistaragráðu í stjórnun heilbrigðisþjónustu. Í tilkynningunni segir að Óskar búi yfir mikilli þekkingu á sviði lýðheilsu og hafi langa reynslu af stjórnunarstörfum á sviði heilbrigðisþjónustu. Óskar var áður framkvæmdastjóri lækninga hjá Heilsugæslunni.

Óskar var einn þriggja umsækjenda í stöðuna.